NEP 2020 tihhlawhtlinna tur thlir

National Education Policy 2020 tihhlawhtlinna atana ruahmanna siam dan tur sawiin Nilaini khan inrawnkhawm a ni.
School Education minister Lalchhandama Ralte chuan NEP 2020 kalpui hlim chu Covid-in min tihbuai lai a ni naa, a theih ang angin bawhzui nghal a ni, tiin, zirna lama mithiamte awmna Group of Expert, Task Force leh Study Group din a ni a, NEP 2020 rawtna bawhzui dan tur an duang tih a sawi. NEP 2020-in rawtna a siam chu sawrkar chuan thui tak a kalpui tawh a, zaa 25 vel tihhlawhtlin a ni hial tawh tih sawiin, “Mizoramah hian kohhran, tlawmngai pawl leh khawtlang hruaitute nena thawhhona a tha a, policy mumal tak neia kal zel dawn chuan tan ho that zel a ngai dawn. NEP 2020-ah hian mahni hnamzia, nationalism inzirtir theihna tur kawng a hawng zau viauin a lang a, Pathianin Mizote hi hnamah a siam a, he policy tihhlawhtlinnaah hian Mizo hnam nihna hi a laimu ah dah a ngai tih chu sawrkar ngaihpawimawh a ni,” a ti.
School Education secretary Dr Lalzirmawia Chhangte chuan NEP 2020-in zirna kalpui dan tur a tarlan zingah, school stage hrang hrangte chu inenkawlna hrang thliaha awm loa kaihkawp a remchan dante, khawsak honaah lehkha chhiar chu nunphung atana hman tur a nih dante a rawn tarlang a. School level-ah pawh library dah a ngaipawimawh hle a, lehkha chhiar nunphungah min hnuhluh a tum tih a sawi.
SCERT director Laldawngliani Chawngthu sawi danin, NEP 2020 umzuitu tur Group of Expert, Task Force leh Study Group bakah kum 2021-ah National Curriculum Framework atan Committee hrang hrang din a ni. Early Child Care and Education tan nghal a ni a, pre-school 433 din tawhin, Diksha portal hmangin zirtirtu 2673 training pek an ni a, Anganwadi zirtirtu 800 training pek an ni. Pre-school zir turte siam a ni a, NEP rawtna Bilingual textbook siam a ni tawh a, Braille text book leh large print text book pawh siam a ni.