Pak-a lei min leh tui lianah mi 300 chuang thi
Pak-a lei min leh tui lianah mi 300 chuang thi
Pakistan leh Pakistan-occupied Kashmir (PoK) huam chhunga fur ruah nasa taka surin lei min leh tui lian a thlena thi chu mi 307 an tling ta.
A tam ber hi Pakistan hmarthlang, Khyber Pakhtunkhwa province-ah a ni tih disaster thuneituten an sawi a. Chenna in 74 a chhiat bakah rescue helicopter pakhat a tla a, thawktu panga an thi.
PoK-ah mi pakua an thi a, hmar lama Gilgit-Baltistan region-ah mi panga an thi bawk niin thuneituten an sawi.
Sorkar chuan an ram hmarthlangah Ningani thleng ruah a la sur dawn niin an sawi a, hmun tam tak chu disaster zone-ah puan a ni.
Buner-ah dam chhuak pakhat chuan tui lian lo thloeng chu ‘chhiatna ni’ a nih thu news agency AFP a hrilh.
“Thawm ring tak, tlang a lo tawlh thla emaw tih turin a lo awm a. Ka tlan chhuak nghal a, kan vel pum chu a nghing dur dur a, khawvel tawp tur ang mai a ni,” tiin Azizullah chuan a sawi.
“Tui tha chak tak avangin lei a nghing a, thihna chuan min rawn hmachhawn ta ni maiin ka hria a ni,” a ti.
Khyber Pakhtunkhwa Chief Minister Ali Amin Gadapur-a chuan Afghanistan nena an inrina, Bajaur pana a thlawh laiin khaw awm danin a zir loh em avangin M-17 helicopter a tla tih a sawi.
AFP-in thlalak a tihchhuahah chuan Bajaur-ah hian mipuiin excavator bakah kut lawngin chirh an hai a. Puana khuhin ruang eng emaw zat a bul lawkah dah an ni bawk tih a lang.
Khyber Pakhtunkhwa-ah hian thite sunna hun atan ni li puan a ni.
Indian awp chi Kashmir-ah pawh Himalaya tlangdung khaw pakhat chu Zirtawpni khan sabereka khuangkaihin hnawlin mi 60 vel an thi a, tam tak chin hriat loh an la awm bawk.
Asia chhim lamah hian fur an tih, June leh September inkarah hian kum khata ruah an dawn hmun lia thena hmun thum chuang mah a sur thin a. Lei min leh tui lian a thleng nasa a, kuminah pawh mi 300 chuang an thi tawh.
July thla khan Pakistan-a cheng mi maktaduai 255 zinga a zahve dawn chenna, Punjab chuan a hma kum July-a ruah an dawn aia 73% zeta tam an dawng a, fura thi pawh an tam zawk.
Scientist-te chuan sik leh sa inthlak nasa avangin khaw awm dan uchuak tak tak hi a nasa telh telh niin an sawi.
Pakistan hi vur khawn tamna niin khawvel lum zel avangin a tui chak em em a, hei hian lung, lei leh thiul dang tam tak a hnawl nasa hle thin.
Tun tuma tui lian leh lei min erawh a chhan tak hriat a la ni lo va, glaciologist-te chuan vur tui hi a chhan lian tak pakhat a nih thu erawh an sawi.