Pak nen innghirnghona karah Air Force chief-in Modi hmu

Pak nen innghirnghona karah Air Force chief-in Modi hmu
Air Force chief Air Chief Marshal Amar Preet Singh chuan Pathianni khan Jammu & Kashmir-a Pahalgam-a thla hmasaa mi 26 thah an nih avanga innghirnghona boruak tang tak a awm mek laiin Pakistan nena Prime Minister Narendra Modi nen an inkawm.
Tun tum inkawmna hi Aprl 22-a Pahalgam beihna thleng hnua prime minister-in sipai chi thum lal berte kawma Pakistan chhang let tura an dinhmun leh kal dan tur a kawmna kal zel a ni.
April 26 khan Modi-a hian Defence Minister Rajnath Singh, National Security Advisor Ajit Doval, Chief of Defense Staff (CDS) Gen Anil Chauhan leh sipai chi thuma an hotu ber theuh hi a lo thutkhawmpui tawh a. Darkar khat leh a chanve an thutkhawmah hian prime minister chuan Pakistan laka beihna chhang let turin sipaite hi ‘zalenna a pe’ a ni.
Pakistan laka sipai chakna hman mai theih a nih lai hian Nilaini khan Army Chief Gen Dwivedi chuan prime minister hi a chenna, 7, Lok Kalyan Marg-ah a lo hmu tawh a. Hetah hian External Affairs Minister S Jaishankar leh NSA Doval te pawh an tel.
Inrinni tlai dar 06:00 khan Navy Chief Admiral Dinesh Tripathi-a pawhin Modi-a hi darkar khat chhung a hmu a. Hemi ni vek chhun laiah Air Force chief Air Chief Marshal AP Singh nen minute 40 chhung an inkawm bawk.
Pahalgam-a khualzin 26 thah an nih hnuah India leh Pakistan inkar a khi zau zel a, Ordnance Factory Board chuan an hnathawk chawlh hmang zawng zawng a ko kir vek am hei hi ram venhimna lama inbuatsaihna tha zawk a awm theih nana tih a ni.
April 22-a mi firfiakten sakawr leh ke chauhva thlen theih Baisaran valley tlawhtu khualzin an kahnaah khan mi 26 thi zinga pakhat kha Nepali a ni a. He thil thleng hian ram pumah thinurna thlenin India chuan Pakistan-in a puihte tihah a puh.
Firfiakte hian Muslim sakhaw thuvawn pakhat, Kalma an tih thei lo zawng thlang chhuakin hmun leh hmunah an kap a ni.
Modi-a hian a sorkar chuan he beihna titu leh anmahni puibawmtute chu chhui chhuakin an tudawl vek dawn tih a sawi a, a tul chuan khawvel tawp thleng pawha an um zui tur thu a lo sawi tawh.
India hian Pakistan nena an inpawhna tam tak tichat nghalin Indus Waters Treaty a titawp lailawk a, Pakistani-te visa titawp nghalin a ram chung boruak chu Pakistani airline-te thlawh phal loh turin a ti bawk.
Pakistan pawhin India lakah khuahkhirhna kalpuiin Simla Agreement pawh a titawp ve bawk.