Pakistan tlang ramah ruang lak theih lohin German Olympic biathlon champion a thi

Pakistan tlang ramah ruang lak theih lohin German Olympic biathlon champion a thi
Laura Dahlmeier-i chu double Olympic biathlon champion niin, Pakistan rama an tlangdung lar tak Karakoram range an tih huam chhunga Laila Peak-ah tlang lawnin a thiannu nen an kal a, chesual palhin a thi tih Nilaini khan tualchhung thuneitute’n an sawi.
Olympic infiamna pakhat ‘biathlon’ an tih hi winter sport chi khat niin, vur tawlh dan pakhat cross-country skiing leh rifle shooting inpawlh a ni.
Intlansiak anga chhiar niin, contestant-te chuan cross-country trail-a skiing ti pahin shooting round an hmachhawn tel a, chu mi belhkhawma sang ber chuan gold medal an awrh thin.
German nula Laura pawh hi chuti ang infiamna kawnga hming chher niin, Pakistan vur lamah hian mountaineering accident a tawk ta hlauh a; a chetsual hun tak hi tunkar tir Thawhtanni chhun lai tak niin, Thawhlehnia chetsual thu puangtu Alpine Club of Pakistan chuan Laila Peak-a Laura tlakna hi metre 5,700 vela sang niin an sawi.
Gilgit-Baltistan region an tih hmar lama Hushe Valley an tih hmuna a kawppui (mountaineering partner) Marina Eva Krauss nen tlang an lawn laiin lung tla thut chuan a deng fuh palh hlauh mai a; Eva hian chhanchhuaktu pawl bepawp nghal vat mah se khaw awmdanin a zir loh avang leh lung a tlak deuh reng bawk avangin chhanchhuaktu helicopter-in a hmun hi thleng thei loin a thlawhkirsan leh a ni.
Rescue helicopter rawih theih a nih tak lohah chuan Germany leh United States atangin expert climber team hnih chahluh niin, anni hian an han zawng a, a thi ngei tih nemnghet theiah inngai mah se anni pawh hian a ruang chu an lachhuak thei ta bik lo a, vur daiah a ruang dai chu an kalsan ta tih regional government spokesperson Faizullah Faraq-i chuan a sawi.
Faraq-i thuchhuah chuan July ni 28-ah Laura Dahlmeier chu Laila Peak (6,069 metres)-a mountain accident-ah a thi a, a zawn hna tan nghal ni mah se July ni 29-ah tawpsan a ni,” tiin.
An sawi zel danin, khatia a chetsual hnu khan a hliam tuar loin Dahlmeier kha a thi nghal nia rin a ni a, a kawppui Krauss-i erawh a inhliam lo hlauh thung a, him takin base camp thlenpui a ni a, a hriselna pawh a tha tih nemgheh a ni.
Tualchhung thuneitu team lam thuchhuahin a sawi zel danin, Laura Dahlmeier hian lo chesual palh pawh ni se midangin an nunna hlu tak chan phah hlauhawm khawp chuan lo zawng lo se a duh a, chu chu hmuh theih ziaka a lo dah dan niin, chuti ang hmun hlauhawm bika a lo chesual palh a nih a, a nunna hial a lo chan ta a nih pawhin a tlukna tlangah chuan a ruang dai chu kalsan mai turin thu a lo thlung fel diam a, chu chu a chhungte pawhin an pawmpui thlap nghe nghe!
Faraq chuan chu lai bial thuneitute’n Laura Dahlmeier-i chhungte thutlukna apiang an pawm tur thu a sawi.
Kum 31-a upa Dahlmeier hian kum 2019 khan kum 25 mi niin biathlon game hi a bansan a, a hma kum chiah hian female biathlete zinga Olympic vawi khata sprint leh pursuit gold la ve ve thei hmasaber a ni nghe nghe.
International Olympic Committee Kirsty Coventry chuan Pyeongchang 2018 Winter Olympics-a Laura hlawhtlinna kha hriatreng a nih kumkhua tawh tur thu a sawi.
Laura Dahlmeier hian Pyeongchang-ah khan medal pathum lai a awrh a, gold pahnih lo medal dang hi bronze a ni.
May 2019-a a chawlh thleng khan World Championships vawi nga a hmachhawn atangin medal 15 a hui tling a, chu’ng zinga pasarih chu gold medal a ni.
German Olympic Sports Confederation leh International Biathlon Union pawhin pawi an tih thu leh sunna an tarchhuak ve bawk.