Pakistani sipaiten zan li nan inkahhai bawhchhe leh
Pakistani sipaite chuan Jammu & Kashmir-a Line of Control (LoC) hrulah a zawna zan li nan inkahhai bawhchhiain silai an hmet puak leh niin Thawhtanni tuk khan India thuneituten an sawi.
“April 27-28 zan khan Pakistan Army duty-te chuan silai tenau hmangin LoC hrula Kupwara leh Poonch district ep atangin an kap,” tiin Indian Army chuan thu a chhuah a, anni pawhin ‘an tih dan ang velin’ an chhang let tih an sawi.
Tun hi Pakistan Army-in Poonch sector-a inkahhai an bawhchhiat vawi khatna a ni.
Indian leh Pakistani sipaite ramria an inkah hi Thawhlehni kal taa Jammu & Kashmir-a Pahalgam-a mi firfiakten mi 26 an thah hnu lam khan an tan a ni.
Pahalgam-a mi firfiak chetna a thlen hnuah khan India leh Pakistan inkar hi a chhe mek a, he thil hi Pakistan-a Lashkar-e-Taiba firfiak pawl nena inzawmna neite tih nia ngaih niin Pulwama-a kum 2019-a beihna thlen hnua Jammu & Kashmir-a thi an tam leh ber a ni.
India hian Pakistan laka a lungawi lohna lantir nan khuahkhirhna hrang hrang a kalpui nghal a. Pakistani sipai palaite a hawtir a, kum 60 chuang lo hman tawh, Indus Waters Treaty titawp lailawkin Attari land-transit post a khar bawk.
Pakistan laka khuahkhirhna hi Nilainia Prime Minister Narendra Modi-a kaihhruai Cabinet Committee of Security thukhawmin an tih a ni a. Modi-a hian India chuan mi firfiakte hi ‘tute nge an nih a hre chhuak ang a, a chhui ang a, a hrem dawn’ tih asawi a, anmahni puitute zawng zawng lakah pawh hremna an pe dawn tih a sawi.
Pakistan pawhin India hi chhang letin an inremna zawng zawng a titawp lailawk a, heng zingah hian Simla agreement pawh a tel.
Hetih lai hian police chuan Pahalgam beihnaa tel nia an hriat mi firfiak pathumte lem chu a tichhuak tawh a. X-a vantlang hriat tur an tihchhuahah mi pathumte hi Suleman tia koh, Hashim Musa leh Talha Bhai tia koh, Ali Bhai, Pakistan-a cheng ve ve leh Anantnag district-a cheng, Adil Hussain Thoker te an ni.
Beihna thlentute chin hrilh theih hnenah Rs nuai 20 pek an tiam bawk.
Pakistani sipaiten zan li nan inkahhai bawhchhe leh
Get real time updates directly on you device, subscribe now.