Palace in Larsen la lut

EPL-ah 15-na ni mek Crystal Palace chuan an squad an thuamchak a, thlasik bazar inkhar ni, thawhlehni khan an player manto ber ni turin Strand Larsen chu Wolves atangin atangin an la lut.
Palace hian Larsen hi £48m thlenga pun chho thei turin an la lut a, kum li leh a chanve daih contract an ziahpui a, jersey no 22 an haktir dawn. AC Milan in lak an tum Jean-Philippe Mateta a cham zui ta bawk nen Eagles tlarhma an hlauhawm thar viau tura ngaih a ni.
Crystal Palace forward thar Strand Larsen hian nipui bazars liam ta khan Newcastle United a zawm hman teuh hle. Chhuak lovin Wolves-ah a cham zui ta zawk a, a tifuh lem lo. Season kal mekah Wolves hi an che chhe hle a, table hnuai ber an luah ngar ngar a, khelh 24 atanga point 8 chauh hmuin an dinhmun a chhe tak zet tawh. A khelhna Wolves che chhe viau mah se Larsen hi chu mimal takin a chetha a, club lian zawkte mit a la viau thin. A ngheta Wolves a zawm hmaa goal a thun theihna kha Palace-ah a neih let leh theih a beiseiawm. Larsen hian Wolves tan EPL-ah goal 14 a thun tawh a. Norway tan vawi 24 khelin goal li a thun tawh bawk.
Larsen an lak luh ruala an forward pawimawh Jean-Philippe Mateta a cham chhunzawm tur chuan Crystal Palace a tiphur leh zual. France forward Mateta hi Serie A club lian AC Milan in lak an tum viau a, a manah £30m sen an huam a, indawrna pawh a kal thui hman hle. An in dawr fel ngei a rinawm viau tawh laiin kum 28 mi hian a khupah hliam a nei a. Hliam nei chunga lak luh em chu duh lovin AC Milan hi an inhnukdawk leh ta zawk a ni.