Nilai zan khan English Premier League ah inkhel pakhat a awm a, tunlaia khel tha tak Manchester United chuan Selhurst Park ah Crystal Palace an hmachhawn a. Erik ten Hag-a team te hian chak theihna hun tha an neih an pawhbelh a, hun tawp dawn tepa Olise free kick chhuih luh hmangin Palace in an chelh.
Khelh 9 zet chak zawn tawh United hian Crystal Palace lakah an khel tha zui leh viau a, point thum hmuin Manchester City an lehpel teuh hle. United hian goal thun tumin mualneitu an nawr fo va, hun tha insiamchhuah zauh thin mahse an chhawr tangkai thei mai bik lo. Mualneitu Palace pawhin hlauhawm siam thin mahse si nghak chetha tak David de Gea an paltlang thei lova, goal an thun thei mai bik lo. Goal awm lova first half a zo dawn emaw tih tawh hnuah United in goal an thun ta nge nge. Christian Eriksen-a’n box chhung atanga a siam tha tak chu Bruno Fernandes chuan minute 44-naah chiang zetin a pet goal a, hmahruaina goal a thun.
-- Advertisement --
Captain Fernandes goal hmang hian United in hun rei tak chhung hma an hruai a. Palace in goal thun theihna hun tha an neih zawng zawng David de Gea-a’n a tihthawnsak vek a. United hian hun pangngai tawp thleng an goal an humhim vangin an chak a rinawm hman hle. Point thum hmu tura minute hnih vel bak khelh belh an ngaih tawh loh laiin United an chesual a, free kick an chawi. He freekick hi Michael Olise chuan minute 90+1 ah goal kilah mawi zet maiin a pet goal a, an si phurh a sut.
1-1 a an inhnehtawk hnuin United in chak ngei tumin thapui an thawh zui zat a, goal pawh an thun belh teuh hle. Midfielder chetha Casemiro chuan hnai takah hun tha hmuin, awlsam taka goal thun thei ni bawk mahse a hun tha uiawm takin a hloh a, goal an thun belh the ta bik lo. Tichuan, inkhel a tawp a, Crystal Palace leh Manchester United te chu 1-1 in an inhnehtawk zui ta a ni.
Hun pawimawh takah chesual a, goal an chhuah danah United manager Erik ten Hag a lung ni lo hle a, a player te a dem thu a sawichhuak. Ten Hag chuan, “Hun tawp dawn hnaih, hmahruaitu tan fimkhur hun lai takah kan chesual tlat kha pawi tak zet. Khatiang hunah angah kha chuan freekick leh corner chawi kan hlau em em tawh tur a ni a. A pawi ber mai chu hun tha nei chunga goal hnih kan thun thei lo kha a ni”, a ti.
An hmelma lian Manchester City lehpelh theihna hun remchang an neih chhawr tangkai zo lo United hian Pathianni zan khian hmahruaitu Arsenal an hmachhawn zui leh a ngai dawn a. Champion beiseina chawk nung turin Old Trafford a an hneh tawh Arsenal lakah tlawm an pumpelh a pawimawh hle ang. Arsenal an hmachhawn hunah hian an midfielder pawimawh Casemiro an chhawr thei dawn lo. United hian khelh 19 atanga point 39 hmuin pathumnaah an inhlangkai a. An chunga awm Manchester City leh Arsenal aiin vawikhatin an khel tam zawk thung.