April 5, Nilai zan khan Manchester United chuan Old Trafford a an mikhual Brenford chu Marcus Rashford goal hmangin an hneh a, palinaah an inhlangkai.
United tan hian minute 27 naah Marcus Rashford chuan he inkhela goal awmchhun hi a thun. Forward chetha tluan tak Rashford hian season kal mekah EPL 15 a thun tling chiah a. Inelna hrang hrangah goal 28 a thun tling tawh bawk. Brentford laka point thum an hmuh hmangin United hian Tottenham an lehpel a, top 4 huangah an let leh.
Nilai zana inkhel dangah pathumnaa awm mek Newcastle United chuan 5-1 in West Ham an hneh a, pathumna an luah nghet. An mualah chiang taka an tlawm vangin Hammers dinhmun a chhia a, tlakhniam an hnaih zel thung.
Pathumna luah nghet tura chak mamawh Newcastle hian London Stadioum-ah an khel tha viau a, minute 6-na lekah Callum Wilson-a’n hma-hruaina goal a thun nghal. Minute 13-naah Joelinton-a’n an goal hnihn a thun zui leh a. Hammers tan minute 40-naah Kurt Zouma chuan goal thunin an si phurh a then a, mualneitu in beiseina thar nei chungin chawlhlawk an hmang.
Chawlhlawk hnu lamah Magpies an khel tha chhunzawm a, goal khat ve ve thun tawh Callum Wilson leh Joelinton ten goal an thun belh bakah Alexander Isak-a’n goal khat a thun bawk a, Mimualah phu takin hnehna an chang a, pathumnaah an awm chhunzawm theih phah.
Newcastle United lakah an tlawm leh tak vangin West Ham dinhmun a chhe deuh deuh zel. Hammers hian khelh 28 atanga point 27 hmuin 15-naah an awm mek naa tlahniam thei dinhmuna ding mek AFC Bournemouth nen an point hmuh a inzat thung. Result tha an neih hleih theih loh vangin West Ham manager David Moyes dinhmun a derthawng leh zual a. EPL-a an khelh leh hmasak berah Fulham laka an tlawm a nih chuan Moyes hi an ban tawh ngeiin a rinawm.
Palinaah Manchester United
Get real time updates directly on you device, subscribe now.
Prev Post
Next Post