Opposition party tangrual 19 te Congress, TMC, AAP leh party dang dangte telna chuan Pathianni May 28 a Prime Minister Narendra Modi-an Parliament building thar hawn a tum chu an (boycott) telpui dawn lo.
Thuchhuah intawm an siamah an boycott chhan sawiin opposition party te chuan, “Prime Minister Modi hian amah ngeiin Parliament building thar hawn a tum a, Presient Murmu hnawla chet a lakna hi kan democracy hmuhsitna niin a phutawka chhanlet ngai a ni,” tiin an sawi a.
“Parliament atanga democracy laimu hipchhuah a nih tawh chuan building thar hlutna a awm lo. Hei vang hian Parliament building thar hawnna hi telpui loh kan tum a ni. Mahni thuduh Prime Minister leh a sorkar kan dodalna hi thu leh ziakin kan kalpui zel ang a, India mipuite hnenah kan hrilh hre zel ang,” tiin thuchhuah chuan a tarlang bawk.
He thuchhuah intawm hming ziah hnantu zingah – Indian National Congress, Trinamool Congress, Dravida Munnetra Kazhagam (DMK), Janata Dal (United), Aam Aadmi Party, Nationalist Congress Party, Shiv Sena (UBT), Communist Party of India (Marxist), Samajwadi Party, Rashtriya Janata Dal, Communist Party of India, Indian Union Muslim League, Jharkhand Mukti Morcha, National Conference, Kerala Congress (Mani), Revolutionary Socialist Party, Viduthalai Chiruthaigal Katchi, Marumalarchi Dravida Munnetra Kazhagam leh Rashtriya Lok Dal aiawh te an tel a.
Telangana Chief Minister K. chandrashekhar Rao a Bharat Rashtra Samiti te chuan signatory nih an dhuh ve lo va, mahse, a hawnna inkhawmna neih chu boycott an tum tho thung a.
Thawhlehni May 23 khan Trinamool Congress, Communist Party of India leh Aam Aadmi Party te chuan inauguration ceremony boycott an tum thu an lo puangsa tawh thung.
Thawhlehni khan Congress president Mallikarjun Kharge leh party general secretary (organisation) K.C. Venugopal te chuan opposition leader te chu biain hmalak dan tur an lo sawilawk pui tawh a ni.
India parliament building hmasa kha British rorel lai kum 1927-a sak niin a te tawh a. Tuna building tharah hian lower member 888 leh upper house member 300 an leng dawn a, tuna hman mekah chuan 543 leh 250 an ni thung.
-- Advertisement --
Parliament-ah Sengol dah dawn
Sengol dah dawn
Pathiannia Prime Minister Narendra Modi an Parliament building thar a hawn turah Speaker thutna bulah golden sceptre (lal tiang) dah a ni dawn tiin Union Home Minister Amit Shah chuan a sawi a. He sceptre hi British tena Indians te hnena thuneihna an hlanchhawn laiin Prime Minister Jawaharlal Nehru kutah hlan a ni a. He lal tiang hi ‘sengol’ tih niin Tamil tawng ‘semmai’ tih atanga lak ‘dikna’ tihna a ni.
British India a Viceroy hnuhnung ber Lord Mounbatten khan he sengol hi Prime Minister Nehru kutah khan a hlan a. History ziaktute chuan Mounbatten khan PM ni mai tur Nehru hnenah khan sengol inpek chu India in independence neia thuneihna inhlanchhawnna chhinchhiahna a ni a ti nia sawi a ni.
Chumi hnuah Prime Minister Nehru chuan Governor General hnuhnung ber C Rajagopalachari hnenah thurawn a la a. Rajagopalachari, Rajaji tia hriat lar chuan Prime Minister Nehru chu Tamil tradition-ah chuan puithiam lal berin lal tiang chu lal thar hnenah thuneihna a kuta a awm ta tih hriattir nan a hlan thin tiin a hrilh tia sawi a ni. He tradition hi Cholas te hun lai khan kalpui thin niin Raj te laka India zalenzia lantirtuah ngaihna tur tih a ni bawk a. Chumi hnuah Rajaji chuan lal tiang inhlanchhawn dan tur chu a ruahman zui tia sawi a ni.
He lal tiang siam hi awlai lo tak niin India Independence chhinchhiahna a nih bawk dawn si avangin Rajaji chuan Tamil Nadu a prominent mutt Thiruvaduthurai Atheenam chu a biak a, chumi hnuah puithiam chuan remtihna pe in Sengol chu Madras a jeweller Vummidi Bangaru Chetty an a siam ta a ni. A sei lam hi 5 feet lai niin a hmar bawkah justice chhinchhiahna ‘nandi’ bull a nei bawk.
Mutt senior priest chuan sceptre chu Mounbatten hnenah a hlan hmasa phawt a, chumi hnuah gangajal a thehin Prime Minister Nehru hnenah kalpuia hlan zui a ni a, India Independence hma zanlai minute 15 ah thlenpui nia sawi niin Prime Minister Nehru-an a dawn pual hian hla phuaha sak nia sawi a ni bawk.
Home Minister Amit Shah chuan ‘sengol’ history chu mi tam zawkin an hriat loh thu a sawi a. Parliament thara dah a nihna tur pawh tunlai leh kan cultural tradition te thlunzawmna tur tiin a sawi a. Sengol hi tunah Allahabad-a museum-ah awm mekin parliament-a dah turin lak a ni dawn a ni