A ZAWNG ZAWNG

By: Rempuia R. Lutmang
Tawng dik lo hlawm tawp hi a vang hle; mahse, a awm teuh.
Tunlaia kan tawng hman dik loh langsar ber chu ‘a zawng zawng’ tih hi a ni. Kan hmanna zawng zawng hi a dik lo vek. ‘A zawng zawng’ kan sawi hian ‘i zawng zawng, ka zawng zawng, in zawng zawng, kan zawng zawng’ tih zawng zawng a huam tel nghal.
A nih chuan tawng dik chu eng nge ni ta? ‘A zawng zawng’ kan hmannaah chuan eng nge hman tur? A tam mai. A zavai, a zawng a za, a nazawng, a kip a kawi, a dang pawh a la tam ang, han sawi takah chuan a aia tha tha in ngaihtuah chhuak zut zut ang chu. Heng kan sawite hi tu ma hman ngai tawh loh, tawng hlui, kan hluihlawn tawh, ‘archaic’ chu ni se ‘a zawng zawng’ hi lawm lo chung chungin a pawm theih tur; mahse, tunlaiah pawh heng tawngkamte hi ni tina kan la hman reng a ni a, tawng dik lo zawkina a luahlan mai mai tur a la ni hlawm lo.
Kan sawi thui hmain thil pakhat chauh, ‘a la ni hlawm lo’ tih kan han hmang zauh a, hetiangah hian tunlai hian mi tam takin ‘a’ ni loin ‘an’ hman an ching hle. Thil nung ni lo, living creature ni loah hian a nazawngah plural ‘an’ kan hmang ngai lo. Tun hma khan ‘mihring ni loah plural hman loh tur’ tiin an lo inzirtir thin a, hei hi chu a lo dik chiah lo, ran leh ramsaah pawh plural ‘an’ a hman theih a, hmanlai pawh khan an hmang ve reng. Thil nung ni reng reng loah erawh chuan a dik lo tlangpui. Thil nung anga kan tawngkama kan chan erawh chuan a hman theih, Chief Seattle tawngkam la chhuak zawk i la, “Heng luite hi kan unaupa te an ni asin (the rivers are our brothers)” tiin lui sawi siin ‘an’ hman a ngai. Mihring ang hrima chhuahin unaupa kan ti tlat alawm. Chutiang a nih si loh chuan a nazawngah (a zawng zawngah ni loin) ‘an’ hman ngawt loh tur. tawng ziah dan min zirtirtu MLC ber pawhin ‘Mizo tawng Ziah Dan’ bu thar berah khan an hmang dik lo teuh mai.
‘A zawng zawngah chuan ni lo mah se’ tih aiah, ‘a zawng a za chuan ni lo mah se’; ‘a zawng zawng hre lo mah i la’ ni loin, ‘a zavaiin hre lo mah i la, a zawng a za hre lo mah i la, a kip a kawiin hre lo mah i la’. Entirna tur dang chu in suangtuahnaah a la tam mai.
Hetiang hian kan sawi fiah theih ang: i, in, a, an, ka leh kan dawt chiahah ‘zawng zawng’ tih hi a awm thei lo; a awm chuan tawng dik lo a ni. Grammar thiamte sawi dan tur angin sawi mai i la, pronoun dawt chiahah he thumal inkawp ‘zawng zawng’ hi a awm thiang lo. Noun emaw, noun phrase emaw, noun anga hman thumal/phrase emaw dawtah chauh a awm thei.
Ram zawng zawng, mi zawng zawng, thil tih zawng zawng, finna zawng zawng, rilru zawng zawng, thinlung zawng zawng, khawlohna zawng zawng, bawkvaka kal zawng zawng, thu zawng zawng, hla zawng zawng, tawngkam zawng zawng, i thiam zawng zawng tihte hi kan tawng dik, kan hman thin dan, tun thlenga kan hman dan chu a ni. I thil sawi zawng zawngah, i hla phuah zawng zawngah ‘zawng zawng’ hma chiahah pronoun a awm tur a ni lo, pronoun a awm pawhin noun a tlazep leh te te phawt tur a ni.
tawng dik lo langsar leh sawngnawi tak hi naupang tawng thiam loina anmahni tawka an hman chhoh a ni duh hle. Meian bei, mei mei, deih, nachin tih ang chi zawng zawng hi puitling atanga chhuak ni loin naupang chin chhuah, an than len chhohpui a ni a. An lo thang lian a, an hriat dik loh hre chhuakin a dik zawk an hmang chhawm ve mai thin. Mahse, ‘a zawng zawng’ hi chu a ni ve hauh lo, puitling atangin a intan tlat. Naupangchhia nia kan ngaihte hian an hmang ngai lo reng reng. Puitling hming pu chin atanga chhuak a ni a, upa lam zawkin kan hmang dik tlat lo. Naupangin an hmang ve ngai te a nih chuan, an bula cheng upaho hman dik loh an entawn a ni ang. A nih loh vek chuan video clip, reel ilo atanga puitling tawngkam an hriat fo avanga hmang ve ta an ni chauh zawk ang.
Puitling atanga chhuak a nih chuan eng titiha lo tiaka lo duah chho ta nge a ni mai le? A chhan ni thei awm rinthu tak meuh meuhin sawi chhin teh ang. Sap tawng atanga lehlin lehkhabu emaw, mi thuziak emaw, mi sermon emaw a ni mahna, Sap chuan ‘my all, my everything, tih ang chi an neih hi. Sap tawng thiam tak, Mizo tawng thiam si lo tawngkam atanga lo piang pawh a ni thei tho. Pathian thu zir mi tam tak kan nei, chung chuan Sap tawng an thiam tlangpui, mipui hmaa ding tura ruat an nih deuh roh avang hian, anni atanga lo zi chhuak a ni mai thei bawk. Lehkhathiam lo ka ni loin, lehkhathiam ka atanga lo put chhuak a ni ngei ang.
Kum 2021 kha a ni ta ang a, ni tin chanchinbua article pakhatah Prof. J V Hluna chuan CM, Pu Zoramthanga biain, “I zawng zawng i la chhuah lo niin ka hria,” a ti a. Hei, a dik miah lo. Hetiangah hi chuan, ‘I thiamna zawng zawng’ tih emaw, ‘I theihna zawng zawng’ tih emaw hman zawk tur a ni. ‘A zawng zawng’ tih ai khan a dik lohna degree hi a la tam lehzual nghe nghe mai awm mang e. Kan sawi tak ang khan, mi naran ka atang ni loin mi thiam ka atangin a lo chhuak tlat zel. tawng mawi leh dik zirtirtu tur nia kan ngaihte berina an hman sual si chuan insiam that a harsa hle ang. Lehkhabuah te reu reu hian a lo chuang hman ang tih a hlauhawm a nia.
Pathian fakna hlaah pawh, “Ka zawng zawng hian fak che ka nuam,” tih a awm te an tia! A hla satu leh hretu an tam poh aleh tawng dik lo chi a inkui tiak hnem dawn tihna a ni a, tha lo deuh asin. A phuahtu hian tawng dik lo theh darh lamah a thawh hlawk viau tawhin a rinawm a, a dik lo suat thawl lamah theihpatawp han chhuah ve leh hlauh thei se la thil lawmawm tak a ni ang.
‘Ka zawng zawng hian’ tih hi, a thumal tin chu Mizo tawng ni bawk mah se, a inrem dan hi Mizo tawng a ni tawh lo. Keimahni irawm chhuakin a daih lo a nih chuan Bible tawngkam, ‘Ka thinlung zawng zawng’ tih te hi hman hreh tur a ni lo, ‘Ka neih zawng zawng’ tih te pawh a hman theih alawm. tawngkam dik leh a thluk a inrem dawn loh chuan a phuah thiam zawkte kutah dah hreh lo i la. ‘A sei lutuk’ tih te hi tawng dik lo hman theihna ticket a ni lo tih i hria ang u.
Kan tawngkam pangngai, mawi leh dik a awm sa reng a, a dik lo zawk hmang khawngkhawbai lui zel loin a dik na na na chu hmang tlang zel ang u hmiang.