Parliament in hnihin rorel hun 40% pawh hmang tling lo ve ve

Parliament fur thutkhawm chu Ningani khan zawh fel a ni ta a, rorelna in hniha thil chi hrang hrang avanga buaina a tam avangin thutkhawm hun tura ruahman 40% pawh an hmang tangkai tling zo lo ve ve.
Fur thutkhawm hi July 21 atanga tan kha niin ni 32 chhungin vawi 21 thut a ni a, rorelna in hnihah hian inhnial buaina chhuak avanga thutkhawm mumal theih loh a tam hle.
Lok Sabha-ah darkar 120 thutkhawm tura duan lawk a nih laiin darkar 37 chauh an thukhawm thei a, 31% chauh rorel pangngaiin a kal thei a. Rajya Sabha-ah pawh darkar 41 leh minute 15 chauh thukhawmin 38.8% chauh ruahman angin thil a kal.
Thutkhawm chhungin Lok Sabha-a bill 14 pharh a ni a, heng zinga 12 chu pawm a ni a. Rajya Sabha-ah bill 15 pawm a ni bawk.
Dan thar atana pawm zingah National Sports Governance Bill, 2025 leh Promotion & Regulation of Online Gaming Bill, 2025 pawh a tel a. Tuipui kaihhnawih bill panga chu dan atana pawm niin hengah hian India-a lawngchawlh hmun leh lawnga thil phurhna thil tihchangtlun dan turte a tel.
Parliament thukhawm hian Manipur-a President’s Rule kalpui mek thla ruk pawh seina leh an state budget 2025-26 a pawm bawk.
Dan awm sa siam thatna, amendment bill pathum pawm a ni a. Heng zingah hian dan bawhchhe nasa zual minister-te an nihna atanga paihna tur pawh a tel a, hei erawh Joint Parliamentary Committee-in an lo en leh tura tih a ni.
Session chhung hian thil pawimawh bik sawihona hun pawh a awm a. Ni hnih chhung Operation Sindoor sawiho a ni a, hei hi Indian sipaiten Pahalgam-a mi firfiakte chetna chhang leta an chetna chungchang niin rorelna in hnihah hian MP 130 chuangin an sawi a ni.
Indian zinga International Space Station (ISS) tlawh hmasa ber, Group Captain Shubhanshu Shukla leh nakin zela van thengrenga inkah kaina tura ramin ruahmanna neih, Viksit Bharat 2047 chungchang pawh sawiho a ni a; mahse, inhnial buaina chhuak avangin a rei lo.
Lok Sabha Speaker Om Birla leh Rajya Sabha Deputy Chairman Harivansh te chuan ‘ruahman lawka rorel tihbuai tumna’ awm thin chu tha lo an tih thu leh hun tha tak tak a liam phah tih an sawi ve ve.
Lok Sabha-ah hian tawngkaa chhan tur zawhna 419 lut zinga 55 chauh chhan hman a ni a. Rajya Sabha-ah pawh zawhna 14 chiah chhan hman niin Zero Hour hman dilna pasarih lut erawh pawm vek a ni.
“Mipuiten inhnialna ril tak tak an beisei a, placard lek chhuah leh inauh buai erawh an mitthla lo. Buaina chawh chhuah reng hian parliament zahawmna a tichhia a ni,” tiin Birla chuan a sawi.
Rajya Sabha hian Tamil Nadu atanga tel MP parukte an thlah.
Sorkar chuan sports, gaming, shipping leh taxation aihhnawih pawimawh tak tak pawm a ni chu lawmawm a nih thu an sawi a, eptute chuan roreltute sawihona pumpelh zel an tum niin an puh.