Parliament rorel thei lovin awm zui nghal

Parliament In hnihte chu rorel thei lova siam niin vawiina chhunzawm turin nimin chhun khan tihtawp lailawk a ni.
Defence Minister Rajnath Singh leh Parliamentary Affairs Minister Prahlad Joshi tena London a thusawina a neih chungchangah Rahul Gandhi chu ngaihdam dil tura an phut thu an sawi hnuah Opposition member lungawilote chu House Well-ah an pungkhawm a ni.
Rajya Sabha-ah pawh Leader of the House Piyush Goyal an London-a a thusawi chungchangah Rahul Gandhi a sawisel nat avangin lungawilohna lantirin a awm tho bawk a.
Nimin khan thlakhat chawlh a nih hnuah Parliament thutkhawm chu tan leh niin Finance Minister Nirmala Sitharaman chuan Jannu and Kashmir budget kaihhnawih paper a pharh a, chumi hnuah legislative business kalpui zui a ni a. Lok Sabha chuan Repealing and Amending Bill, 2022 leh Rajya Sabha in Constitution (Scheduled Tribes) Order (Fifth Amendment) Bill, 2022 leh Constitution (Scheduled Tribes) Order (Third Amendment) Bill, 2022 an ngaihtuah tura chhawp chhuah a ni a.
Parliament hi February 10 daih tawh khan budget paper pharh a nih hnuah thla khat chhung zirchian a nih theih nan thlakhat chawlh lailawk a ni a. |hutkhawm hnuhnung berah khan Opposition te chuan Congress leader Mallikarjun Kharge leh Rahul Gandhi thusawi te nuai reh tur tia sorkarin a tih avangin sorkar an bei nasa hle a, hei bakah hian MP Rajani Patil suspend leh Adani group te chungchang chu sawihlawh ber a ni bawk.
Nimina thutkhawm neih leh hmain Rajya Sabha-a Leader of Opposition Mallikarjun Kharge chuan Upper House-ah Opposition te chet dan tur duang turin opposition party meeting a ko nghe nghe a ni.
Rajya Sabha bikah Leader of House Piyush Goyal chuan tun hnaiah London-a Rahul Gandhi thusawi chungchang sawiin, Goyale chuan Rahul Gandhi chuan ram pawn a zinnaah India chu dinhmun chhe takah chhuah a tum a ni a ti a. Opposition te chuan Goyal thusawi chu an chhang a, mahse Chairman Jagdeep Dhankhar chuan tute pawhin House-ah an ngaihdan an sawi thei a ti thung.
Opposition leader Mallikarjun Kharge chu ding zuiin Goyal thusawi chu a dem thu sawiin, Rajya Sabha-ah Lok Sabha member te thusawi khel chu dan kalh a ni, a ti a.
“Khawvel pumin thil thleng awm dan an hre vek a. He ramah hian Constitution-in a duh dana demcoracy a kal lo kan tih hian sawiselin kan awm a. Mahse, Prime Minister Narendra Modi berin China ah India ramah democracy a awm lo a ti a lawm,” tiin Kharge chuan a sawi.
Lok Sabha-ah pawh rorel lai member te chuan Congress leader Rahul Gandhi chu tun hnaia London-a thusawi a neihah ngaidam dilna siam turin an phut a. Hei vang hian rorel thei lova an siam hnuah Chair Rajendra Agrawal chuan House chu March 14 a chhunzawm turin a titawp ta ringawt a ni.
Parliament House pahnihte hian ruahman ang chuan budget February thlaa pharh tak sawihona te an nei zui nghal dawn a ni.