SC-in neih inang inneih ngaihtuah zui zel

Centre chuan same-same marriage (neih inang inneih) chungchangah Supreme Court hnenah mipui nawlpui te chuan inneihna chu mipa leh hmeichhia inkara thleng turah ngaiin chu chu ‘inneih thianghlim’ anga India ramin a ngaih a ni, a ti.
“Inneih hian thianghlimna thuk tak neiin India ram hmun tam berah chuan thil thianghlim anga ngaih a ni a. Kan ramah hian mipa leh hmeichhiate chu innei tura pawmna mai bakah inneihna chu tun hmaa tih dan leh kalphung, culture mil leh society duh danin thuk taka a luhchilh a ni” tiin Centre chuan affidavit an theh luhah a tarlang.
‘Mihring inlaichinna’ a vantlang leh sakhuain a pawm atanga pen tumna Supreme Court thupek kaltlang ni lovin dan siam hmang chauha kalpui tur chi a ni, tiin sorkar chuan a sawi bawk.
Sorkar lam chuan Supreme Court chuan neih inang tena mipat-hmeichhiatna an hman chu kum 2018-a Navtej Singh Johar judgement-ah dan pawnah a hnawl lo a ni mai a, a pawm e tihna a ni lo tiin a sawi bawk a. Court chuan mawngkawhurna chu dan bawhchhiatna a ni lo a tih rualin neih inang inneih (same-sex marriage) chu fundamental rights to life and dignity, Article 21 of the Constitution huam chhunga tel a la ti ngai lo, a ti bawk.
Sorkar lam chuan same-sex marriage chu mipa leh hmeichhia induha inneia chhungkuaa chenga an kara fa piang nena angkhata ngaih theih chi leh khaikhin theih a ni lo a ti bawk a.
“Inkawpa sexual relationship neiha neih inang te an chen dun hi Indian family unit concept a pasal, nupui leh fate ang nena khaikhin theih chi a ni lo,” tiin sorkar chuan a sawi bawk a.
Hei mai bakah hian same-sex inneihna registration siama kalpui chu personal leh codified law provision awmsa te bawhchhiatna thlen zui tur a ti bawk a.
“Parliament chuan ram chhungah personal law leh codified law te leh religious community hrang hrangte tih thin dan leh kalphung milin marriage law a siam a, chutah chuan mipa leh hmeichhiate chu innei thei a ti a, chumi kaihhnawiha lefal leh statutory rights te chu dan anga lekkawh a ni. He kalphung hi thlak danglam a nih dawn chuan he rama personal law te inmil tawk leh societal value te inmil tawka kalpui chu a tibuai ngei dawn a ni,” tiin sorkar chuan a sawi bawk a.
Heterosexual marriage (mipa leh hmeichhia inneih) kalpui leh pawmna chu tunhma atang tawha ramin a tih dan leh kalphung ni sa kalpui chhunzawm zel a ni a ti bawk a. Sorkar chuan vantlang nawlpui te chuan inneihna tiin mipa leh hmeichhiate inneihna chu pawm tura duhna leh nawrna a awm tiin a sawi bawk.
Sorkar-in affidavit a thehluhna chhan hi Supreme Court-in Special Marriage Act hnuaia same-sex marriage te dan anga pawmna kalpui tura ngenna a ngaihtuahna kal zel kaihhnawihah a ni a. Special Marriage Act of 1954 chuan an personal law hnuaia innei thei lote tan civil form-a an inneih theihna tura a ruahmanna a ni.
Tun hnaiah petition thahnem tak theh luh niin chung zingah chuan cheng dun Supriyo @ Supriya Chakraborty and Abhay Dang ten an theh luh pawh a tel a, same-sex marriage pawm duh loh chu thleibikna tia sawiin LGTQ+ inkawp te zahawmna engahmah ngaihlohna tiin an sawi a. Hei bakah hian petition dang Parth Phiroze Mehrotra leh Uday Raj Anand te pawhin an theh lut bawk.
Court chuan Union of India leh Attorney General of India te hnenah notice hran ve ve thawnin hei bakah hian High Court hrang hranga he mi kaihhnawih issue awm mek te chu a ngaihtuah tura thawn turin a ti bawk.
Senior advocates Mukul Rohatgi, Neeraj Kishan Kaul, Menaka Guruswamy leh advocate Arundhati Katju te chuan Navtej Johar case kaihhnawih kal zel tiin an sawi a. Petitioner te chuan 1954 Act chuan inter-caste leh inter-faith inkawp duhte inneihna a pe ang bawkin same-sex inkawp te inneihna a siamsakin a remti tur a ni an ti.