Party awmna a sawn apiangin remna chungchang a sawi dang – Lalrintluanga Sailo

Chief minister Pu Lalduhoma chu a party awmna a sawn apiangin remna chungchanga a thusawi a dang zel tih MNF MLA Lalrintluanga Sailo chuan a sawi.
Zirtawpnia MNF office Mizo Hnam Runa inkhawmah MNF National Core Committee member ni bawk Lalrintluanga Sailo chuan, kumin Remna Ni lawmnaa chief minister thusawiah India nena inremna point 17 chu amah leh MNF president Pu Laldenga nena an duan ni awmin a sawi tih sawiin, “India nen kan inremna point 17 kha Pu Lalduhoma leh Pu Laldenga duan dun niloin, ramhnuai sawrkara cabinet-ten an duan a ni. Kan CM hi a party awmna a sawn apiangin remna chungchanga a thusawi a dang zel thin a; chuvangin inremna chungchang hi sawi ve tawh lo se ka duh a ni,” a ti.
Mipui nawlpui, sawrkar hnathawk awm ve lohna chhungkua pawhin rualkhai taka sawrkar zar kan zo ve theihna, UT kan nih lai atang tawha kum 51 chhung buhfai subsidy-a kan lei thin, kg ah Rs.15 atangin a let thawk Rs. 30-in ZPM sawrkarin a ti to chu mak a tih thu MNF MLA hian a sawi a. POL atanga chhiah lak tihsante, inrenchemna kalpui inti si a, thaba rulhna nia insawia sum tam tak senga Lungleia Council of Ministers an thukhawm chu, ‘sum tam tak aia hmingthatna thlang zawk’ inti party thiltihah chuan a awm lo hle tih a sawi a ni.
MNF chu hnam party an nih angin thawhhona tha tak nei a, taima tak a ram leh hnam tan a thawk chhunzawm zel turin party mite a fuih bawk.