Party dang aiin MNF danglamah ngai

Party dang aiin MNF danglamah ngai
Ram tana thi leh thau pawlha bei tawh MNF chu party dang aiin a danglam hle tih MNF National Core Committee (NCC) member D Thangliana chuan a sawi.
Thawhtannia an party office-a inkhawmah MNF NCC member chuan MNF party thil tum ruahmanna tha tak an hruaituten an lo kalpui tawhnaah party dangte aiin an danglam tih a sawi a. Mizote chu tu thuhnuaiah mah kun ngai lo, mahnia ram hran leh roreltu hran neia kan luah chinah khawsa mai, kan luah chin ram leh hnam humhalh kan duh avanga phaitual thlenga kan pi leh puten lu chhum ban chhum huama an lo beih tawh a ni tih a sawi.
“British sawrkar kan hneh loh avangin mahnia thuneihna sang tak neiin British thlazar hnuaiah kan awm chauh zawk a, kan ram tana thi leh thau pawlh a bei tute chu MNF party hi kan nih avangin party dangte aiin kan danglam em em a ni,” a ti.
MNF-in Mizoram zalenna sualin bei ta lo se, tuna kan dinhmun chu kan chang phak lo maithei tih D Thangliana hian a sawi. Assam state hnuaia District Council pakhat ve mai chu MNF movement avangin Union Territory-a hlankai kan nih hnu ah, inremna thuthlung vangin state-a hlankai kan ni leh tih a sawi. “He inremna thuthlungah hian tuna Mizoram leh hnam humhalhna tur dan engemawzat siam a ni a. Chu’ng inremna dante chuan chimrala kan awm lohna turin Mizoram leh hnam hi min humhalh a ni.” a ti.
Tunlaiin party thenkhatin mipui sawrkar din intiamin, sawrkar kal tawh zawng zawng chu mipui sawrkar ni lo angin an puh niin MNF hruaitu hian a sawi bawk. “Inthlang ram kan nih vangin mipui tam berin an duha an vote apiang an tling mai thin. Chu chu mipui siam sawrkar a ni. Mizo Union atanga vawiina sawrkar thleng hian mipui siam sawrkar a la ni zel a ni,” a ti.