SZA-i’n a vawi khat nan Hot 100-a No.1 kai thei hla a nei ta

SZA-i’n a vawi khat nan Hot 100-a No.1 kai thei hla a nei ta
SZA hla hit ‘Kill Bill’ chu Billboard Hot 100-ah No.4 atangin No.1-ah a invawrh a, he chart-a a No.1 vawi khatna a ni. ‘Kill Bill’ hi Hot 100 chart-ah hian No.2-ah kar riat ngawt a hman a, chuta tangin a tawlh ta a, a No.1 thei dawn ta lo nia a lan laiin, Doja Cat remix a rawn chhuak a, chu chuan a tilar thar leh ta a ni. Hetihrual hian Ice Spice leh Nicki Minaj hla thar ‘Princess Diana’ pawh top 5-ah a debut.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
SZA ‘Kill Bill’ hi radio airplay-ah ngaithlatu maktaduai 86.5 nei angin an chhut a, stream maktaduai 28.3 leh download sales 5,000 a tling a, hei hi chart-ah a No.1 pui ta a ni. SZA hian Hot 100 chart top 10 a lang thei hla pasarih a nei tawh a, chung zingah chuan Doja Cat a feature-na ‘Kiss Me More’ chu No.3 a kai bawk a, top 5-a lang thei hla pahnih a nei a ni.
Morgan Wallen ‘Last Night’ chu a zawn ni lo va kar thum a No.1 hnuah No.2-ah a tawlh ta a, chart No.1 hlui bawk Miley Cyrus ‘Flowers’ chu No.3-ah bawk a la awm.
Ice Spice leh Nicki Minaj hla thar ‘Princess Diana’ chu stream maktaduai 21.8, radio airplay maktaduai 2.4 leh download sales 77,000 tlingin, No.4-ah a debut a, Ice Spice tan he chart-a top 10 kai thei hla pahnih a neihna niin, PinkPantheress nena an zai dunna ‘Boy’s a Liar, Pt.2’ pawh top 10 a lo kaipui tawh a, he hla hi tunkar chart-ah No.8 atangin No.10-ah a tawlh ta a ni a, No.3 te pawh a lo kai zak zak tawh a ni. Minaj tan erawh he chart top 10-a lang thei hla 22 a neihna niin, hmeichhe rapper zinga he chart top 10-a lang thei hla ngah ber a ni.
Eslabon Armado leh Peso Pluma ‘Ella Baila Sola’ chu stream maktaduai 31.8 neiin, No.10 atangin No.5-ah a invawrh a, regional Mexican zinga he chart top 5 a kai thei hmasa ber a ni.
Metro Boomin, The Weeknd leh 21 Savage “Creepin'” chu No.5 atangin No.6-ah a tawlh a, Rema leh Selena Gomez ‘Calm Down’ chu No.6 atangin No.7-ah a tawlh a, chart No.1 hlui The Weeknd leh Ariana Grande ‘Die for You’ chu No.7 atangin No.8-ah a tawlh a, Drake ‘Search & Rescue’ chu No.2 atangin No.9-ah a tawlh ta bawk.