Party dang laka thalaite hel tir tuma tlangauah puh

Party dang laka thalaite
hel tir tuma tlangauah puh
Sawrkarna siam tawh ten engmah hnathawh nei lo anga party dang laka thalaite hel tir tuma tlangau thin an awm tih Lunglei District Congress president KL Chhawnzauva chuan a sawi.
Thawhtannia Lunglei Congress Bhavan-a inkhawmah LDCC president chuan tunlai hian party thenkhat ten thangtharte hnenah Mizoram political party awm tawh ten Zoram tan leh Lunglei tan engmah thawk lo angin zirtirna an thehdarh nia sawiin, thangtharte diklo taka hruaikawi tumna a ni tih a sawi.
“Congress party chauh nilo MNF leh PC party te pawhin Mizoram tan mai nilo Lunglei tan nasa taka hna an lo thawh tawh vang zawka vawiin thlenga hmasawnna hmu kan ni a; Congress sawrkarin Mizoramah remna leh muanna a awm theihna’na a thawhte, hun harsa leh thim ber atanga min chhanchhuah dan leh hmasawnna ruhrel lian tak tak a lo thawh tawhte hi kan thalaite hian an hriat a tul a ni,” a ti.
Hetihlaia tute emaw in party dang laka thalaite hel tir tum niawm taka sawrkarna siam tawh ten engmah hnathawh an nei lo, ti zawnga an tlangau thin leh social media hmanga an thehdarh thin chu thu belhchian dawllo a ni tih thalaite pawhin hria se a duh tih Congress hruaitu hian a sawi a. Congress sawrkarin ram tan leh Lunglei tan eng te nge a lo thawh tawh tih zirchiang ve se a duh tih a sawi.