Party pathumin a mala sorkarna siam theih an inbeisei

Mizorama Political party pathum MNF, Congress leh ZPM president theuh te chuan hnehna chan ngei an inrin thu leh party mala sorkarna siam theih an inbeisei thu an sawi theuh.
Chief Minister nilai, MNF president Zoramthanga’n party malin sorkarna an siam nawn leh ngei an beisei tih THE ZOZAM TIMES zawhna chhangin a sawi a, seat pawh an lak hnem a rin thu a sawi.
An tlin leh chhan tur zawhna chhangin, ram pumpui boruak thlirin an party chu an tha a, Covid 19 hri leng harsatna chu an su chhuak a, hri leng karah nasa takin hna an thawk tihte, chumi chhunzawm tur chuan ram mipuiin sorkarna an siam tir leh ngei a rin thu a sawi a, Mizoram chhehvela cheng Zohnathlakte an lo tuam hlawmna avangin ram mipui te pawh an lawm a, chungte mipuiin MNF an thlawn nawnna tur nia an ngaih thu a sawi.
A dinna bial Aizawl East I bialah a tlin leh ngei a beisei thu sawi bawkin,”Ka huphurh lo khawp mai, party dang atangin lian deuh hlek rawn kal tura ngaih a nih laiin a lian lutuk lo an rawn dah thliah tliah a, chuvangin kan tlin ngei ka ring a, ka huphurh lo,” a ti.
Mizoram Pradesh Congress Committee (MPCC) president Lalsawta chuan nimin zing khan Mission vengthlang Polling station-ah vote a thlak a, hemi hnua amah kawmtu chanchinbu mite zawhna chhangin Sawta chuan, an party-in a mala sorkarna an lak theih a rin thu a sawi a, seat an lak zat tura a rin zawhna chhangin,”Vai ho chuan 25 an ti a, keini chuan 26 te in kan inchhut a, thenkhatin 22 an ti a, thenkhat chuan 10 chuang ring te pawh an awm ve tho a, a tlangpuiin sorkar theih kan in ring,” a ti.
Sawta chuan, MLA inthlanpui neih dangah chuan straight fight a ni thin a, kuminah chuan triangular fight a ni tlat a, a danglam deuh tih a sawi a. Sorkarna an chana an ngaih pawimawh hmasasak ber tur zawhna chhangin Manifesto an nei a, Manifesto chu an ngai pawimawh dawn tih a sawi.
ZPM President Lalliansawta pawhin nimin zing dar 7:30 vel khan Mission veng polling station-ah vote a thlak a, vote a thlak zawh hnua THE ZOZAM TIMES-in a kawmnaah Liansawta chuan, party mala sorkarna an siam theih ngei an ring a, seat 25 atanga 30 inkar an lak a rin thu a sawi.
Sorkarna siam tura mipuiin ZPM candidate an thlanna chhan tur nia a ngaih zawhna chhangin,”Mipui rilru ah hian kan au hla te hi a tla na a, kalphung thar mipui sorkar hi kan thlahlel tawh a, party sorkar kan hrawn reng a, tunah chuan mipui sorkar kan nghakhlel a, chuvangin sorkar kan chan kan beisei a ni,” a ti bawk.