Pathian ruata pawm an ngai – Lalthlengliana

Tuna roreltute chu Pathian ruata pawm an ngai a, enchhin an intiam angin an kal em tih an lo thlir zel dawn tih MNF vice president Lalthlengliana chuan a sawi.
Thawhtannia MNF office – Mizo Hnam Runa inkhawmah Lalthlengliana chuan, inthlanpuiah chak leh inringin an bei a, an tla ta si a, kumkhuain a tlin reng theih tlat loh tih a sawi. “Roreltute hi Pathian ruat an ni tih pawm ila, tuna roreltute pawh hi a ruatte an ni. Min enchhin rawh u, tia intiam an ni a, engtin nge an kal zel kan thlir dawn a ni,” a ti.
Ram tana hna thawk tak tak chunga ro an rel a nih chuan tha a tih thu leh sawrkar hmasain thiltha an tih chu chhunzawm zel se a duh thu a sawi a. Mipui hmaa an intiam anga an thawk tha lo a nih erawh chuan an dim dawn lo tih a sawi bawk.
MNF chuan inthlan a hmachhawn tam tawh a, tlak chang a nei angin tlin chang pawh a awm thin tih MNF vice president hian sawiin, “Tunah eptu lamah thu mah ila, nakinah kan thochhuak leh dawn. Taima taka beituten a tawpah thawhrim rah an seng thin a, taima taka ‘Pathian leh kan ram tan’ tiin bei zel ang u,” a ti.