Pathianni inkhawm laia in rawktu chhuichhuak rang

Pathianni inkhawm laia Lungleia in pakhat rawktu chu darkar 24 chhungin chhuichhuah a ni.
Lunglei addl SP Beihmotaosa chuan Thawhlehni khan Lungleia thuthar thehdarhtute a hrilh danin, tunhnaiah Lungleiah rukruk a hluar a, ruihhlo ti tam lutuk vang niin a sawi.
July 9 khan Lunglei Police Station ah Sethlun Lunglei ami R Laltanpuia chuan FIR thehlutin, July 9 chawhma dar 10.00 leh chhun dar 12.30 inkar, an inkhawm hlanin an in kawngkhar chu tu tih hriat lohin karchhia in an wardrobe chhunga BCM Sethlun kohhran sum leh an chhungkaw sum Rs. 2,70,000 ruk chhuah niin a ziak a ni.
Lunglei Police hian Sethlun VDP nen tangdunin an rinhlelh pakhat, C Lalawmpuia chu thu an zawtfiah a, July 10 chhun dar 12.30 khan he thil hi ama tih niin a inpuang a. A thil ruk atang hian Rs 2,68,095 hmuh let leh a ni.
Darkar 24 chhunga rukru chhuichhuah a ni chu lawmawm an tih thu leh VDP nen an thawhhona zar a ni tih addl SP hian a sawi a. Mitinte rukru laka kan him theihna’n CCTV dah uar tur te, chhungkawtin ten kawngkapui kalhna tha tak neih a tul bakah tukverh leh ventilation ah bar vuah vek thei se an duh thu te a sawi. Kohhran, NGO leh mimal ten pawisa tam tham tak ina kawl loh a him tih leh, Pathianni inkhawm laiin rukru an chet thin avangin fimkhur zual a ngai tih a sawi bawk.