Pawar-a’n BJP-in mipui ‘mandate‘ nei lo ti

Prime Minister Narendra Modi an a zawna term thum chelh tura thuneihna a chan hnuah NCP (SP) president Sharad Pawar chuan ram kaihruai turin ‘mandate’ a nei em tiin zawhna a siam thung.
Saffron party te chuan Lok Sabha inthlanah khan majority an nei pha lo va, Centre-a thuneihna chang zui turin party dang puihna an mamawh a ni, tiin a sawi a.
NCP din champha tum 25-na lawmna Admednagar a neihah leh party MP te chawimawina neihnaah Pawar chuan, “Narendra Modi chuan June 9-ah Prime Minister ni turin rinawmna thutiam a la a. Mahse, rinawmna thutiam a lak hma khan he ram mipuite manadate a nei em? He ram mipuite hian remtihna an pe em? BJP ten majority an nei pha lo. Telugu Desam Party leh Bihar Chief Minister Nitish Kumar te puihna avangin sorkar siam thei chauh an ni,” tiin Pawar chuan a sawi.
Union minister hlui chuan BJP kaihhruai NDA sorkar mek chu a hmaa an sorkar nen a inang tawh lo a ti bawk a.
“Inthlan lai khan PM Modi chuan campaign a neihna apiangah sorkar chu ‘Government of India’ a ti ngai lo Modi Sarkar, Modi guarantee a ti thin. Vawiinah chuan Modi guarantee chu awmze nei lo a ni tawh a, Modi Sarkar pawh a ni tawh hek lo. Vawiin hian in vote avangin he sorkar hi Modi Sarkar ni tawh lovin Government of India a ni ta a ni. Nangmahni avangin an kal dan an thlak a ngaih phah ta a ni,” tiin Pawar chuan a sawi.
PM post hi he ram tan a ni a, party mal bik tan a ni lo va, PM ni mek chuan society-a mi tin te, hnam leh thurin te a ngaihtuah vek tur a ni a ti bawk a.
“Modi hian chu chu a theihnghilh tlat a. A tilui niin ka hria, minority Muslims, Sikhs, Christians, Parsis te hi he rama mi pawimawh tak tak te an ni. Sorkar-ah rinna an nghat tur a ni a, mahse Modi chuan a tihlawhchham a ni. A campaign naah pawh mi thenkhat fa ngah te a tia a, a kawh chu Muslim te a sawina a ni,” tiin Pawar chuan a sawi bawk.
NCP(SP) chief chuan Modi-a’n “bhatakti aatma” (wandering restless soul) tia a kohna chu chhangin ‘a tha, thlarau chu chatuan a ni a, chu thlarau chuan a zuah dawn bik lo che’ a ti bawk a. Modi chuan Shiv Sena (UBT) chu “nakli (fake) Shiv Sena” a tih chngchangah pawh Pawar chuan PM meuhin pawl ‘nakli’ tia koh chu a dik thei lo a ti bawk a. “A chetdan hian a hril chian em em chu thuneihna chan theihna a tlem chiah chuan a awm hle hle thei lo,” tiin a sawi bawk.
NCP(SP) chung chang sawiin Pawar chuan mipuite thlawp ni turin hmalak zui zel a ngai a ti a. “Maharashtra ah chauh a ni lo, Haryana leh Jharkhand-ah te tun atanga thla tum vel leka inthlan awm mai turah te sorkar siam thei ngei turin hma kan lak a ngai a ni,” a ti.
Party worker-te chu pawl tichaka society a hnuaihnung te tana thawk tura ngen bawkin mi tam takin Ram temple sak chu politics-ah pawimawh em em turah an ngai a, mahse, BJP te chu Ayodhya-ah ngei pawh hnehin an awm a ni tiin Pawar chuan a sawi bawk a.
“Naktukah Ram Temple tlawh dawn i la, politics thilah hman ka tum ve dawn lo. Ayodhya mipui te chuan Modi thiltih dik loh an hria a, BJP candidate tlak nan hma an la mai a ni,” a ti a ni.