Pawl 12 zir tur tan scho’ pe thei

Matric exam-a mark zaa 85 chin chunglam hmu, chhungkaw sumpai lakluh kum khata cheng nuai thum aia sang lo tan Vahani Scholarship Trust chuan scholarship a tih sak thei a, an zirna senso dang pawh tum theih engemawzat neiin, anmahni kaltlanga zir zo tawh, mi hlawhtling tak tak an awm tih an sawi.
Mission Foundation Movement puihna in Vahani Scholarship Trust hotute hian thuthar thehdarhtute hnenah scholarship an pek theih dan hi an sawifiah a. An tum chu zirlai, zirna lama tha si, khawsak lama harsa bikte mimal hmasawnna leh ram hmasawnna atan chawikan a ni tih an sawi a. An scholarship hmang hian India rama zirna sang leh tha ber bera zirlai lut tur leh zir mekte huamin, academic fee leh hostel fee zawng zawng an tum sak vek pawh engemawzat an awm tih an sawi.
Tunah hian India ram state 16 velah lut tawhin, Mizoram atang pawhin scholarship dawng thei tur hian dil an awm tawh thin a, hmu tura ‘tling phak’ an la awm loh avangin, zirlai tam zawkin rawn ‘tum chhin’ se an duh a, hetiang hian an rawn puangzar ta tih an sawi a ni.
Scho’ ngawr ngawr bakah laptop stipend, an zirna kaihhnawiha an kal velna senso leh internet an hman man, personal mentorship, internship, career counselling leh skill building support thlengin an ngaihtuah sak tel thei tih an sawi a. Scho’ dawng thei tura dilna hi August 1 khan hawn tan niin, November 1 thleng khian dil theih a ni a. Dilnaah hian insenso a ngai loa, hrechiang duh leh dil duh tan – vahanischolarship.com ah dil leh enfiah theih a ni tih an sawi.