Pawngsualtu leh ruihhlo tawlhtu court-in a hrem

Kolasib Fast Track Court chuan heroin kawl vanga man mi pahnih leh kum tling lo hmeichhia pawngsualtu chu jail tang tur leh sumfai chawi turin a hrem.
Kolasib Fast Track Court judge R Vanlalena hian hmeichhe naupang kum tling lo pawngsualtu K Rothangliana (57), Bairabi chu kum 20 chhung hrehawm taka jail tang tur leh sumfai Rs. 7000 chawi turin Thawhlehni khan a hrem. 2022 May thla khan pawikhawihtu hian hmeichhe naupang kum 6 mi hi a thiante nena an awm laiin a hruai hrang a, pawi a khawih lai hi mipa naupangten hmu in a insaseng zui a; a hnu ah hmeichhe naupang pa hian FIR a thehlut a ni.
Thawhlehni vek khan 2022 December 1-a heroin gram 853 (hawng 50) kawl kaihhnawiha man Lily Zothanpari (30) Kolasib Tumpui Veng leh a thurualpui nia sawi Lalparmawii (38), Sawleng khua nia inchhal chu an chungthu ngaihtuah bawkin thiam loh a chantir a. Hrehawm taka kum 10 chhung lung in tang tur leh sumfai Rs. 10000 ve ve chawi turin a hrem.