PCI leh BCM-in Manipur-a Kristiante tinzawnna dem

Mizoram Presbyterian Kohhran (Presbyterian Church of India) Mizoram Baptist Kohhran (Baptist Church of Mizoram) chuan Manipura tharum thawhna leh inthahna thleng bakah Kristiante hmun leh hma tihchhiat a ni chu an dem tih an sawi.
Mizoram Presbyterian Kohhran thuchhuak chuan Manipur-a Meitei leh tlangmite inkara buaina chhuak avanga harsatna namen lo an tawk chu pawi a tiin, mi tam takin nunna an chan te, biak in, kohhran office leh quarters, mimal in thahnem tak hal a ni chu pawi a tih thu a sawi.
‘Pawi sawi lo nunau leh naupangte chena nunna laksak an ni hi Bible zirtirna kalh tlat a ni a. Hetianga rawng taka chete hi kan dem takzet,’ a ti a. India danpui, ‘Right to Freedom of Relegion’ palzuta Kristiante hmun biak in halsak, tihchhiat sak leh Kristiante thil serh bungrua chi hrang hrang tihchhiat sak a, halsak an ni chu pawi a tiin, hetianga titu te hi a dem takmeuh tih a sawi bawk.
He buaina avanga nunna chante, in leh lo bungrua leh chhungkaw ro chan zawng zawngte, lu nghahna pawh nei loa vakvaite chu Mizoram Presbyterian Kohhran chuan a lainatin, a tuarpui takzet tih a sawi a ni.
Mizoram Baptist Kohhran pawhin thuchhuah siamin, Manipur-a rawng taka inthahna thleng leh, chenna in leh lo intihchhiat sak a, inhal sak te, nunau pawisawi lote sawisa a, thlabara insiam chu Pathian thu nen a inrem loh avangin hetiang titute hi a dem tih a sawi.
Sakhaw hmun serh intihbawrhban sak leh inhal sak chu India ram, secular state-a thil thleng atana thil tih awm lo a nih bakah India danpui kalh tlat a ni, tiin, hetianga sakhaw hmun serh intihbawrhban sak chu a dem takzet tih a sawi.
‘Nunna chan ta chhungte, in leh lo chan leh sahimna atana raltlante Mizoram Baptist Kohhran chuan a khawngaihin a tuarpui em em a; Pathian thlamuanna leh awmpuina an chungah thleng se a duh a; tanpui theih ang angin a lo tanpui ve tawh a, tanpui zel pawh kan tih turah kan ngai,’ tiin, Manipur-ah rorelna dik, Pathian duhzawng angin rorelna thleng se tih hi an duhdan a ni tih a sawi.