Parliament-in ram puma hman turin Uniform Civil Code (UCC) chu pawm mah se, ram danpui hnuaia Article 371G hmangin Mizoramah hman ve nghal theih a ni lo, tia sawi chu innghahna tlak a ni lo tih Congress party chuan an sawi.
MPCC thupuangtu Ronald Sapa Tlau chuan UCC chu India ram inpumkhatna tichhe thei tur leh hnam tenau leh sakhaw tezawk rahbehna leh inchimralna hmanraw hlauhawm tak a nih dawn avangin a tawp thlengin Congress party chuan a dodal dawn tih a sawi a. Article 371G chu Mizoram tan Special Provision a nih avangin, mi thenkhatin, ‘Parliament-in UCC hi pass mah se, Mizoram Legislative Assembly-in a pawm ve kher loh chuan Mizoramah hman theih a ni lo ang,’ tia an sawi thin chu innghahna tlak a ni lo tih a sawi.
“Zofate sakhua leh hnam nihphung humhim tur chuan Mizo mipui himna awmchhun, Parliament-a UCC pass an tum hi mipui nawlpuiin a tawp thlenga kan do zel hi kan tihmakmawh a ni,” a ti.
UCC chungchang India mipuiin an ngaihdan Law Commission-a thlen theih hun (June 14 – July 30) chhung ngeia Mizoram Kohhran Hruaitute Committee-in political party tinte tura Law Commission-a a ngen angin MPCC president Lalsawta chuan a remchan veleh an party-in a doldalna thu a thlen dawn tih a sawi bawk.
India zalenna sualchhuaktu Congress party-in ram dan a lo duanchhuah chu Kristiante tan leh tribal leh hnam tenau dangte tan emaw tu tan mah a hnawksak tur a ni lo, tih chu vawin thlengin nghet taka an la vawn tlat Congress thupuangtu hian sawiin, central lama Congress party hruaitute pawhin UCC hi an thlawp lo tih a sawi.
UCC dodalna’n Art.371G a him tawk lo – MPCC
Get real time updates directly on you device, subscribe now.