Pence-a’n campaign tan ta

US vice-president hlui Mike Pence chuan kum 2024 presidential election a Republican candidate nih tuma a beihnaah Donald Trump a kap na hle a.
Donald Trump chu US constitution laka rinawm lo leh conservative values te phatsanah a puh a. Nilaini khan Indiana governor hlui leh congressman hian White House campaign a Tan a ni.
A pu hlui Trump nen an inhmachhawn zui zel dawn a. Pence chuan Trump chan 6 January 2021 a US Capitol beihna kha a fuihpawrh tiin a sawi, chutah amah Pence chuan election result chu a hnawl a beiseia a tisual a ni, a ti bawk a.
“American mipuite hian thudik hriat an phu a, khami ni khan President Trump chuan, ‘amah nge constitution ka thlan dawn’ tiin min nawr a ni,” a ti a.
“Tunah pawh voter-te chuan duhthlan tur ngai bawk in nei ve: Kei chuan constitution ka thlang zawk zel ang,” tiin a sawi bawk.
January ni 6, 2021 thil thleng avang khan Trump chu president chuh theih tawh lova siam a ngai zawk a ti a. “Mi tu pawh constitution aia chunga inngai chu United States president a ni tur a ni ngai lo,” a ti bawk a.
“Mi tu pawh constitution aia amah chawisang tura nawrtu chu United States president a ni leh tur a ni lo,” tiin a sawi bawk.
Kum 64-a upa Pence chuan Trump mai bakah Democratic President Joe Biden pawh bei telin an pahnih chu Americans dangte ‘ngaihdan inang lo neih pawha inhrethiam taka inzahtawnna leh ngilneihna lantir Thin’ te angin an awm thiam ve lo tiin a sawi bawk.
Hei mai bakah hian Trump-an a hmaa Russian President Vladimir Putin ‘genius’ tia a lo sawi tawh avangin a sawisel bawk a. “Kei chuan genius leh war criminal danglamna ka hria a, tu nge Ukraine indonaa chak mamawh pawh ka hria,” tiin a sawi bawk.
Republican candidate ni tur hian Trump leh DeSantis mai bakah New ersey Governor Chris Christie bakah North Dakota Governor Doug Burgum te pawhin an chuh tur thu an sawi vek a ni.