Pentikos Ni hmang
May 19, Pathianni kha kohhran ni pawimawh – Pentokis Ni a ni a, kohhran hrang hrangin hemi pual hian hun an hmang.
Mizoram Presbyterian Kohhran chuan Sunday School kalpui loin chawhma, chawhnu leh zanah Pentikos Ni thupui awmsa hmangin an inkhawm a. Zan inkhawm hi Presbyterian Church of India General Assembly pualin tawngtai rual a ni a, inkhawm thawhlawm pawh PCI General Assembly pual a ni.
Baptist Church of Mizoram chuan thupui thlan sa hmangin chawhma inkhawmah Pathian thuchah an ngaithla a. BCM hian May 13 – 16 thleng hian Kristian Chhungkaw Chawlhkar an hmang a, zantin thupui thlan sa an zir ho thin a ni.
Chhandamna Sipai Pawl pawhin chawhma dar inkhawm chu Thianghlimna Inkhawm atana an hmang a. Thupui thlan sa hmangin thuchah an ngaithla a. Zan inkhawm chu ‘Chhandamna Inkhawm’ niin thupui thlan sa bawk hmangin Pathian thuchah an ngaithla a ni.
Pentikos tih hi ‘Sawmngana’ tihna a ni. Thuthlung Hluiah chuan Kalhlen Kut tiak ni atanga ni 50-naah an hmang thin a, Thuthlung Thar hunah erawh Isua Thawhleh tuk (Easter) atanga ni 50-naah hman a ni.