Pharmacist indaih lohna phuhruk duh

Pharmacist indaih lohna phuhruk duh
Mizoramah pharmacist post sanction 122 a awm laiin, tuna a ngheta thawk 25 chauh an awm a, Pharmacy Council hotu Dr Montu Kumar M Patel chuan sawrkar hospital-a pharmacist indaihlohna hi phuhru turin sawrkar a ngen tih a sawi.
Mizoram tlawha rawn zin Pharmacy Council of India president Dr. Montu Kumar M Patel chuan thuthar thehdarhtute a kawmnaah pharmacist-te hi an pawimawh hle a, Section 42 of Pharmacy Act 1948-in pharmacist-te chauhin damdawi hi an pechhuak thei tih a sawi a. Pharmacy Council thuneihna pawh a sang hle tih a sawi a ni.
Mizorama sawrkar damdawi in hrang hrangah pharmacist post sanction 122 a awm laiin, post ngheta awm 25 chauh an awm chu a rilru nat thlak tih a sawi a. Sawrkar hospital hrang hrangah pharmacist-te indaih lohna a nasa hle dawn tiin, sawrkarin post ruak 97 hi hnawhkhat thuai se an duh tih a sawi.
State Pharmacy Council-in pharmacist-te training leh skill development neihpui reng a tum tih Dr Patel hian a sawi a. Skill development a awm theihna turin Health minister a sawipui a, Mizoram sawrkarin hmunhma a ruahhman sak theih chuan central atangin a training-na hmun sakna tur tum an huam tih a sawi a ni.
Mizoramah damdawi hmansual leh damdawi thalo a tam lutuk chu veiawm a tih thu sawiin, damdawi lei leh hralh kawngah dan khuahkhirhna a that lehzual theihnan Food and Drugs Administration-ah drugs control officer sanctioned post 12 a awm laiin, post ruak 7 awm chu hnawhkhah thuai a nih theihnan sawrkar chu hma la turin a ngen tih a sawi.
Pharmacy Council hotu tawiawmtu RIPANS Department of Pharmacy head Dr H Lalhlenmawia chuan, dan hnuaiah pharmacist-te chauhin damdawi an pe tur a ni a, damdawi an pek rualin a ei dan tur leh side effect awm thei thlengin a leitute an hrilh thin tur a ni tih a sawi. Dan kengkawh tur hian Mizoram State Pharmacy chuan hma a la mek a, pharmacist-te chu damdawi dawra thu vek tura hma lak a ni tih a sawi bawk. Pharmacist-te damdawi dawra an thut thlap chuan doctor chawh chin chiah damdawi an pek thin dawn avangin drugs ngawl veina intanna pawh a kiam vek a ring tih a sawi a ni.
Pharmacy Council of India president hian Health minister Lalrinpuii bakah larsap a kawm bawk.