PHC building thar hawng

Ngentiang Primary Health Centre building thar chu Ningani khan Health minister Dr R Lalthangliana chuan a hawng a. Bialtu MLA, minister Er Lalrinawma chuan a telpui.
Tun kum nga chhungin Community Health Centre sak thar 20 chuang an nei a, hawn mai theih tura sak zawh tawh an la awm nual bawk tih Health minister hian a sawi a. Ngentiang PHC sak thar pawh hi Ngentiang leh a chhehvel mipuiin tangkai taka an hman a beisei tih a sawi. Covid lengin khawvel, India leh Mizoram sawrkar na taka a nghawng chungin Health department bikah pawh Sub Centre 375 an neih chu Health and Wellness Centre-ah an hlangkai hman vek a. Primary Health Centre 61 leh Community Health Centre 9 an nei tawh tih a sawi bawk.
Ngentiang PHC building thar hi NABARD (RIDF XXVI 2020-21) fund cheng nuai 266.5 senga sak a ni a. 2021 February atanga sak tan niin, chhawng hnih a ni a, kumin June 6 khan zawhfel a ni. A satu, contractor hi C Lalrengliana, Aizawl a ni.