Zuangtuiah Mall din theih dan tur thlithlai

Chief minister Zoramthanga hoin minister Robert Romawia Royte leh sawrkar department hotu thenkhat leh khawtlang hruaitute chuan Zuangtuia FCS&CA kudam-ah kalin Unity Mall sakna atana a remchan theih dan tur a thlithlai.
‘Unity Mall’ chungchang hi kumin February khan Union Budget Session-ah Union Finance minister chuan sawiin, tourism leh mahni kutkawiha eizawngte hmasawnna atan leh inpumkhatna atan state tinte an capital-ah din tum tura tih an nih thu a lo sawi tawh a. State tinte an state nihna leh ziarang phochhuak tha thei ber tur thil siamchhuah/ tharchhuah (One district, One Product), GI product leh handicraft thilte chawilar na’na tih niin, mall tinah hian mahni state bakah ram chhung state dangte thil siamchhuah theuh pawh pholan ve tur a ni. Sawrkar laipui chuan a sakna tur cheng vaibelchhe 120 chuang a dah a ni.
FCS&CA kudam hi Sairang Dintharah sawn tura hma lak mek niin, Nilaini khan kudam thar hi chief minister hian a sakna tur lungphum lo phum tawh a. Sak zawh a nih hunah Zuangtuia Supply department ram hi mipui tana tangkai thei ang bera hman tum a ni.