Guinness World Record siam lama mikhual lo tak, Spanish pa danglam Christian Roberto Lopez Rodriguez, kum 34, chuan hmeichhe bun chi, pheikhawk keratui sang (high heels) inches 2.76 a sang bun chungin second 12.82 chhungin meter 100 a tlan hman a, high heels bun chunga meter 100 tlan thleng rang thei ber record a siam. A hmaa hetiang record siamtu chu Andre Ortolf niin, 2019 khan second 14.02 chhunga meter 100 tlan thleng hmanin record a siam a, he record hi a rawn khum ta a ni.
Christian-a tlan chak dan hi pui tak a ni a, meter 100 tlan a world record siamtu Usain Bolt-a 100-metre sprint world record pawh second 3.24 chiahin a pha lo.
Guinness guideline-ah chuan hetiang record siam tur hian pheikhawk keartui hi cm 7 (inches 2.76) tak a sang, a pheikhawk chhip 1.5cm (0.59 inch) aia pharh hlai lo an bun ngei tur a ni.
Christian chuan, “High heels bun chunga chak taka tlan theih kha a challenging khawp mai. Spain-ah chuan hetiang intlansiak hi a awm fo a, keipawhin ka titha thawkhat ve viau thin,” a ti.
Christian chuan he record siam a duhna chhan pakhat chu Type 1 diabetics ni chung pawhin zunthlum (diabetes) ve lo te tih theih ang a ti ve thei tho tih lantir a duh vang niin a sawi.
Christian hian mittuam (blindfold) chunga meter 100 tlan thleng rang thei ber record te pawh a lo siam tawh a, second 12.45-ah a thleng hman a, hnung zawng (backward)-a meter 100 tlan thleng rang thei ber (second 13.17) record te pawh siam tawhin, kut zungtanga baseball bat balance chunga meter 100 tlan thleng rang ber (second 13.83) record leh mitthuam (blindfold) chunga thil pathum juggling chunga meter 100 tlan thleng rang ber (second 15.28) record te pawh a lo siam tawh a ni.
Pheikhawk keartui sang bun chunga meter 100 tlan thleng rang thei ber
Get real time updates directly on you device, subscribe now.
Next Post