Phili si loa inruahman a tul – Health minister

Phili si loa inruahman a tul
– Health minister
Covid-19 hri a darh leh mek tak avangin, engemaw thleng thut theiah phili si loa inruahman a tul tih Health minister Dr R Lalthangliana chuan a sawi.
Mizorama Covid-19 leng dinhmun thlirhoin Thawhlehni khan Health minister ho hian Health department leh a kaihhnawih department hotute an thukhawm a. Zoram Medical College-ah Covid-19 hri kai damlote enkawlna tur ICU khum 5 leh ward pakhat (khum 10) la zuah reng a nih thu sawi niin, tun dinhmunah ICU-ah damlo pakhat, Ward-ah damlo pakhat enkawl mek an ni. ICU leh ward te hi a tul anga tihlen theih tura ruahman sa an ni. District hospital zawng zawngah doctor leh thawktu dangte training tha tak pek an nih tawh avangin hri kai damlo enkawl kawngah pawh ziaawm beisei tawh a ni.
Covid-19 vaccine hi sawrkar laipuiin a thlawnin a pe tawh dawn lo tih sawi a ni a. Mizoram sawrkarin kan mamawh angte a lei ve zel a ngai tawh dawn. COVISHIELD hi siamchhuah a ni tawh loa, COVAXIN leh COVOVAX vaccine hman a ni tawh a ni. RT-PCR test kit leh Covid hri kai serious-te enkawlna tur damdawi man to chi a tul anga lei turin National Health Mission-in ruahmanna a siam tih sawi a ni.
Tunhnaia Mizorama Covid-19 positive hmuhchhuah tharte hi symptom nei deuh vek an ni a, travel history nei awm loin, tualchhunga hri kai nia hriat vek an ni thung.
Hun engemawchen hri kai thar kan neih tawh loh hnuah April atang khan an awm thar leh a, tun dinhmunah phei chuan hmarchhak state 8 zinga positive case nei tam ber kan ni tih minister hian sawiin, “Hengte hi awareness kan neih that zara kan in-test that vangte niin a hriat a, mipui leh official-te tan chiaina tur thil a la awm rih lo nia a lan rualin, kan hun tawng tawhte atangin kan fimkhur chuan kan inveng thei tih a hriat a, hri laka invenna kan hriat tawh sa, a bikin hmai tuamna (mask) vuah uluk kan ngaihpawimawh thar leh a pawimawh a ni,” a ti.
Engemaw lo thleng thut thei thilah kan talbuai loh na’n phili si loa inruahman lawk erawh a tul tih a sawi a ni.
Hmalam hun hriatlawk a nih loh avang leh thil lo thleng leh thei turah damlote enkawl dan tur leh a hmachhawn dan, lo inruahman dan tur siam tha tih niin, a buaipuitu turte an inruat a, damdawi leh hri dona hmanraw hrang hrang kan neih mek dinhmun zirchian a, a tul anga ruahmanna siam nghal tha tih a ni. Puipunna hmunah mask vuah tha tura mipui inzirtir leh a tul tih sawi a ni bawk.