Philippines-in China dalna thianfai

Philippines chuan South China Sea inchuh meka Philippine sangha mantu lawng te an kal theih loh nana China-in danna a siam chu a thianfai.
Philippines coast guard te chuan President Ferdinand Marco Junior thupek anga chet la an nih thu an sawi.
Manila chuan China chuan Scarborough Shoal a 330m huam chhunga fishing rights a neih chu a bawhbuaisak tiin a sawi a.
China hian South China Sea 90% vel chu a ram angah chhalin Scarborough shoal pawh hi kum 2012 khan a thunun zui a ni.
Beiijing chuan insawifiahna nei thungin tuipuia danna a siam chu tihmakmawh a ti a.
“Lawng chetvelna kawngah harsatna siam thei leh international law kalh a ni a. Filipino tam tak tena intunnun nan bera sangha an man tibuai a ni bawk” tiin Philippines coast guard-te chuan an sawi ve thung.
Scarborouygh shoal chu Philppine national territory huam chhung liau liau tiin an sawi bawk a. China-in danna a siam hi karkal ta Zirtawpni khan an hmuhchhuah chauh thu a sawi bawk.
Heng dannate hi Chinese coast guard boat leh Chinese maritime militia service tena an dah a ni.
Chinese boat-te chuan radio challenge 15 siam nghalin Philippine ship leh sangha mantute chu international leh Chinese law bawhchhiaah a puh ve thung a.
Hetihlai hian Japan chuan helai bial vela remna leh muanna a awm theih nan South China Sea chu pawimawh tawp tia sawiin insumkar turin ngenna a siam thung.
“Kan ram chuan South China Sea a boruak sosang thei a duh lo takzet a ni” tiin Japanese Chief Cabinet Secrertary Hirokazu Matsuno chuan a sawi a.
South China Sea hi sangha manna hmun hausa tak mai niin a hnuaiah oil leh gas reserve tam tak a awm bawk a. Khawvela lawng zahve vel lawih hi he lai bawr vel paltlang tia sawi a ni.
China hian South China Sea leh a chhehvel hauh a tina hle a, hei vang hian Philippines chauh ni lo, Vietnam, Taiwan, Malaysia leh Brunei te pawh a tithinrim hle a ni.
China hian South China Sea thunun a tumna lamah thliarkar siamchawpte siamin, chungah chuan sipai hmunpuite a din bawk a.
US pawhin ngaimawh em emin South China Sea-ah hian freedom of navigation tiin indo lawngliana tirlut chamchi bawk a ni.
Scarborough Shoal pawh hi China chuan kum 2012 khan thununin a hnaiha sangha mantu Philippines mite chu hmun danga insawn turin a tizui a ni.
A hnuah Philippines-in President atana Rodrigo Duterte an neih hnuah inkar boruak a tha a, sangha man pawh China chuan a phal zui a. Mahse, nikuma Ferdinand Marcos Jr an thuneihna a chan hnuah boruak atang zui leh ta a ni.
President Marcos Jr chuan US nena inzawmna siamtha lehin kum 2023 kumtir lam khan American sipaite pawhin Philippines military base zau zawka an hman pawh a lo remtihsak tawh bawk.
Chu chuan China tithinur em em thungin, US chu South Korea leh Japan-te bakah Australia-te nena amah hual tuma chet la tiin a sawisel zui a ni.
China-in South China Sea tuipui ram pumpui deuhthaw a hauh bur avang hian harsatna hrang hrang a khat tawkin a thenawm ramte nen an nei reng tawh a. South China Sea-a China ramripui neih tinte chuan China hmalakna hi duh lo hle in inkhakbuaina a khat tawkin a thleng zauh zauh reng a. Philippines nena an buaina chu ram dangte aiin a nasa zual deuh bik bawk.