Refugees ten Armenia ram pan nasa

Azerbaijan-in thuneihna a chan hnuah Nagorno-Karabakh chhuahsan Armenian refugee an thahnem hle a.
Armenia panin mi 6,500 chuang kal tawhin Nagorno-Karabakh-ah hian ethnic Armenians 120,000 vel an awm anga ngaih a ni.
Hetihlai hian Armenia PM chuan ethnic cleansing kalpui mek a ni tiin a sawi a. “A thleng mek a, a vanduaithlak em em a, international community-te hrilh hriat ngei kan tum a ni” tiin Nokol Pashinyan chuan a sawi.
Azerbaijan thung chuan ethnic Armenian-te chu ‘khua leh tui ang khat’ a ngaiin re-integrate an duh tiin a sawi thung.
Hetihlai hian EU huaihawtin Armenia leh Azerbaijan-te chuan inbiakna an nei dawn a. US state department thupuangtu Matthew Miller chuan inremna a awm ngei theih nan ngenna a siam zui bawk a.
Karabakh main city Stepanakert-ah chuan petrol station puak avangin mi 200 chuangin hliam an tuar niin local human rights ombudsman Gegham Stepanyan chuan a ziak a.
Mipui Nagorno-Karabakh chhuahsan duh an tam avangin Armenian border ah chuan traffic a jam nasa hle bawk a. Chutihlai chuan chhuahsan duh miah lo pawh an awm tho thung.
Hetihlai hian Yerevan-ah mi 140 chuang manin an awm a, anti-government protest neih vang niin local media te chuan an sawi.
Karkalta atang khan Nagorno-Karabakh-ah hian sorkarin buaina chinfel a tum danah lungawi lohna neiin buaina a chhuak tawh a. Pashinyan chu Azerbaijan laka thil phal lutukah puhin bang turin an nawr a ni.
Armenian seperatist force-te chuan kar kalta Nilaini khan Azerbaijan military offensive do zo dawn lova inngaiin an ralthuam tum an lo remti tawh a ni.
Hetihlai hian Nagorno-Karabakh ethnic Armenian leader Samvel Shahrmanyan chuan Armenian-te chuan an chhuahsan vek a rin thu sawiin ‘kan ram kan tih ngawih ngawiha Azerbaijan thuneihna hnuaia awm ai chuan 99.9% in chhuahsan an thlang ang’ tiin a sawi.
“Kan mi leh sate chanchin hi nakin zelah Armenian mite mai bakah civilised world tana zahthlak tia sawi a la ni ang” tiin a sawi bawk a.
“Heng thila mawhphurtute hian nikhat chu an thiltihsual avangin Pathian hnen atangin zawhna an chhan a la ngai ngei ang” tiin a sawi bawk.
Nagorno-Karabakh hi South Caucasus a tlangram niin khawvelin Azerbaijan ram anga a ngaih niin mahse kum tam tak chhung chu ethnic Armenian tena an thunun a ni.
Armenia-in a thlawp tlat niin hei bakah hian an thawhpui Russia in a thlawp a ni bawk a, Russia chuan sipai kum tam tak a dah tawhna a ni bawk a ni.