Pilot leh Gehlot ten inremna nei thei

Rajasthan Chief Minister Ashok Gehlot nena an inkar siamthat nia langin, senior Congress leader Sachin Pilot chan State-ah Congress sorkar a pian nawn leh ngei theih nan worker tinte theihtawp an chhuah tur thu a sawi.
Assembly poll neih tur kaihhnawiha All India Congress Committee (AICC) headquarters a brainstorimng session darkar li chuang neih a nih hnuah party general secretary (organisation) K.C. Venugopal chuan ‘hruaitu inlungrual’ chuan inthlan hmachhawn dawnin party forum pawna hruaitu tupawhin party chhung thil a sawi a nih chuan khauh taka hremna lekkawh a ni ang a ti bawk.
Meeting hi Congress president Mallikarjun Kharge-an kaihruaiin senior leaders Rahul Gandhi, Venugopal, Pilot, AICC’s Rajasthan in-charge Sukhjinder Randhawa leh State unit chief Govind Dotasra te pawh an tel a. Ashok Gehlot pawhin election strategy meeting hi virtual in a zawm a ni.
“Chief Ministerial candidate kan puang ve ngai lo; mahse, inthlan hi lungrualin kan hmachhawn dawn a ni,” tiin Venugopal chuan a sawi bawk a.
Gehlot leh Pilot inkar siamthat nana peace formula sawina neih a ni lo va, mahse, hruaitu lawk pahnih te hian Pilot-an issue thenkhat tihmakmawha ngaih a neih a sawi hnuah inremna an siam anga ngaih a ni.
Venugopal chuan Ashok Gehlot sorkar chuan Assembly-ah bill pahnih a pulut vat dawn a ti a, pakhat chu Rajasthan Public Service Commission (RPSC) bill niin exam hrang hranga question paper tiput ru te hremna na tak kalpuina tur a ni, a ti.
Pilot chuan meeting neihnaah BJP sorkar hmasa Vasundhara Raje kaihhruaiin eirukna an kalpui nasat dan a sawi a. Rahul Gandhi pawhin BJP sorkar hmasa bakah Centre a BJP sorkarin eirukna an kalpui dan lailang tura hma la turin a ti bawk a.
Pilot chuan, “Inthlan awm tur kaihhnawihah sawihona tha tak an nei a, rilru inhawng takin kan sawi tlang a ni. Congress te chuan kum 2018 Assembly inthlan aiin kan che tha anga sorkar kan siam ang,” tiin a sawi a.
“BJP te chuan rilru lak pen tumin theihtawp chhuahin eirukna kaihhnawih sawilan a nih loh nan hma an la a. Mahse, Congress party chuan hma la zui zelin Public Service Commission reform pawh rang takin kan kalpui ang,” tiin Sachin Pilot chuan a sawi bawk.
Mimal anga a dinhmun tur zawhnaah Pilot chuan, “Party-in ti tura min duh leh tih apiang ka zawm mai ang,” tiin a sawi bawk.
Venugopal chuan party chuan September thla velah daih candidate tur te an tihchhuah tur thu sawiin ground survey an neih hnuah tling tura an ngaih te an dah mai dawn tiin a sawi bawk a.
Congress tena pro-poor scheme an kalpui chuan a thawk na tia sawiin Venugopal chuan, “Sorkar hnathawh that behchhanin hma kan la ang a. Naktuk atangin kan MLA ten door-to-door positive campaign an tan ang,” tiin a sawi bawk.
Gehlot leh Sachin Pilot inremna awm theih nan hian minister hlui leh Bialtu MLA Harish Chaudhary chu palaia hman niin inremna siamin a awm tia sawi a ni a. “Hruaitu tumain party forum pawnah thuchhuah hran an siam tur a ni lo. Hei hi State leh party atang pawha kan duhdan inang tlang vek a ni,” tiin Chaudhary chuan a sawi.