United States-in Manipur buaina ngaihven

Manipur-a tharum thawhnaa inthahna thleng mek chu an ngaihven thu sawiin India-in ‘a be rawn’ a nih chuan US chuan ‘puih a inhuam reng’ tiin India rama US Ambassadror Eric Garcetti chuan a sawi.
Kolkata-a press conference a neihah Garcetti chaun Kolkata khawpuia sakhua hrang hrang awmkhawm chu fakin US chuan India khawchhak leh hmarchhak lamah nasa zawka inhnamhnawih a duh dawn tiin a sawi bawk a.
“Manipur chungchang sawi hmasa ber i la, remna a awm theih kan beisei a ni. United States ngaihdan min zawt a nih chuan ‘strategic’ thila kalpui chi a ni lova, mihring mihrinna thil zawk a ni. Manipur-a naupang leh nunna chan thite hmuh leh tharum thawhna hmuh chuan ngaihsak turin Indian nih kher a ngai lo. Northeast leh khawchhak lamah hian thil tha tam tak a awm a, chungte chu remna tel lo chuan a kal reng thei lo,” tiin Garcetti chuan a sawi.
“Ngen kan nih chuan kawng tinrenga puih kan inhuam a ni. Indian thil a ni tih kan hria a, remna a awm kan duh takzet a ni. A chhan chu remna a awm a nih chuan thawhhona tha zawk te, project tam zawk leh investment te kalpui theih a ni dawn a ni,” a ti bawk a.
“Thil chiang tak ka sawi duh chu – United States-in India khawchhak leh India hmarchhak hi a ngaihven a ni. A mipui te, a hmun te, a theihna te hi kan tana pawimawh a ni,” tiin a sawi bawk.
Hei mai bakah hian Northeast region chuan strategic zawng pawhin pawimawhna thuk tak a nei tiin ram dang panga lai nena ramri nei a ni, a ti bawk.
Kolkata a tlawhnaah hian Garcetti chuan West Bengal Governor C.V. Ananda Bose leh Principal Chief Adviser to the Chief Minister Amit Mitra te pawh a hmu a.
Garcetti hi zirlai a nih lai pawha Indian culture zir ngat niin India ram urban culture leh development hrethiam leh hre thuk tak anga ngaih a ni.
India khawchhak lam hi US nena inzawmna thuktak nei niin kum 1748 daih tawh khan Kolkata-ah US chuan mission hmasa ber a hawng tawh a, US envoy chaun 1794 khan Kolkata a thleng tawh a ni. Mahse, British East India Company khan US mission chu pawmpui lovin US envoy Benjamin Joy chu commercial agent a nih erawh an ti thung.
US nena inlaichina chu Indopui II laia Kolkata leh northeast India chu Allied Powers tena Japanese forces te nawr let beihpui an thlak laia hmunpuia an hman avangin inzawmna siam nghehin a awm zui ta zel bawk a ni.