Pilot project-in ‘Bana Kaih’ kalpui ang
ZPM sawrkarin Bana Kaih Policy a kalpui tur chu sawrkar department thlan bikah pilot project-a kalpui phawt a ni dawn a, thlai thar lei an tum avangin an hmanhmawh lutuk thei dawn lo tih adviser to chief minister Dr KC Malsawmzauva chuan a sawi.
Thawhtannia ZPM party office-a inkhawmah adviser to chief minister chuan Bana Kaih (Hand Holding) policy-ah hma la turin department 17 an sawiho pui tawh a; agriculture & allied sectors, tourism leh industry-ah pilot project kalpui phawt a ni dawn tih a sawi.
“Thlai thar lei kan tum vangin hei hi kan hmanhmawh chuk chuk thei rih loa, sem policy ang ngawta kalpui tur a nih loh avangin Hand Holding hi bank loan hmangin project base-a kalpui kan tum. Chief Minister Special Package pawh awm thei tura ruahman chhin a ni a. Ruahmanna fel tak nen fimkhur taka kan kal a ngai a, hlawhtlin kan tum a ni,” a ti.
Model code of conduct a zawh hunah thlai thar lei tura an ruahmanna mumal zawka puangzarin policy atangin programme-ah an lut dawn a. Thlai thar leitu turte an dawr zel a, agreement mumal tak an siampui dawn tih Dr KC Malsawmzauva hian a sawi. “Politics rawngkai loa rual taka kan kal theih nan regulated market society-a kalpui kan tum avangin farming society din tur a ni a, Cooperation department hnuaiah society tinin registration tih a ngai,” a ti.
Agriculture department hnuaiah Marketing Board din tum niin, cabinet meeting hmasa berah chhawpchhuah tum a ni tih a sawi a. Thlai thar pali – sawhthing, aieng, hmunphiah leh hmarchate an leina tur rate bithliah aia sanga an hralh theih chuan sawrkarin inrawlh kher a tum lo anga, rate bithliah an siam chu grade ‘A’ niin, sawhthing leh thlai dangte aiin hmarcha chu market tha ber a ni tih a sawi bawk
An sawrkar tirhin hmunphiah chungchangah sawiselna an tawk a, uluk zawk leh tha taka an kalpui theih nan rate bithliah chungchangah kan fimkhur hle a, Mizoram hmun hrang hranga an chinte zirchian zel niin, warehouse 6 siam tum a ni a, dahthatna hmun kan neih chuan a thar loh hunah pawh hralh theih a ni dawn tih a sawi a ni.