PinkPantheress-i’n BRIT Award record siam
PinkPantheress-i’n BRIT Award record siam
PinkPantheress chu 2026 BRIT Awards-ah producer of the year dawng tura thlan a ni a, hmeichhe zinga he award dawng hmasa ber a nih dawn bakah he award dawng thei naupang ber a ni bawk ang. Award hi February ni 28 hian Manchester-a Co-op Live arena-a an sem hun a dawng dawn a ni.
Producer of the year hi 1977 atang khan BRIT Awards-ah hian an telh tan a, mipa hlirin an la dawng a, chung zingah chuan Paul Epworth, Eurythmics atangin David A. Stewart,leh Trevor Horn ten tum thum theuh dawng tawhin an dawng ngun ber a, anni bakah hian Sir George Martin (1977), Brian Eno (1994 & 1996) leh Calvin Harris (2019) te pawhin an lo dawng tawh bawk.
Hmeichhe producer nomination a lang an lo awm ve zauh zauh tawh a, Kate Bush leh Goldfrapp te pawh nominate an lo ni tawh a, mahse, hmeichhe producer ten he award hi an la dawng ngai miah lo a ni.
PinkPantheress hi kum 24 mi niin, he award dawng thei naupang ber a ni dawn a, a hmaa he award dawngtu zinga naupang ber chu Culture Club leh The Beach Boys te pawh lo thawhpui tawh Steve Levine niin, 1984 khan kum 25 mi niin a dawng.
PinkPantheress hian 2021 khan a music a vawi khat nan a tlangzarh a, a hlaphuah thiamna bakah a production thiamna te chuan fak a hlawh nghal viau a, kum 17 mi niin GarageBand a lo produce tawh a, heta tang hian a hla record zawng zawng pawh aman a produce vek a, 2023-a a album ‘Heaven Knows’ leh 2025-a a mixtape ‘Fancy That’ te pawh a produce a ni a, Fancy That hian 2025 khan Mercury Prize a dawng nghe nghe a, UK Official Albums Chart-ah No.3 a kai thei a ni. A hla hit Ice Spice nena an thawh dunna ‘Boy’s A Liar Pt.2’ chu 2023 khan Billboard Hot 100 (US singles) chart-ah No.3 a kai thei bawk.
PinkPantheress chuan, “Hmeichhe zinga he award dawng hmasa ber ka ni tur hi min lo hriat vena avangin ka lawm takzet a ni. Ka music production hi ka inchhuan vena ber a ni a, ka thawkrim bawk a, chuvangin midang te cho phurtu ka nih ngei pawh ka beisei,” a ti.
2026 BRIT Awards-ah hian Noel Gallagher leh Mark Ronson te pawh chawimawina dawng tur zinga puan an lo ni tawh a, Noel Gallager hian songwriter of the year a dawng dawn a, Mark Ronson hian outstanding contribution to music award a dawng bawk ang.