Placement agency ho license cancel A dan kan siamtha rang dawn – CM

Mizoram atanga ram pawna hna thawk tur thawnchhuak thin, private placement agency 27-te license chu sawrkarin a cancel sak a. Agency kaltlanga hna thawk tur thawnchhuah theihna dan chu siamthat ran a ni dawn tih chief minister Lalduhoma’n a sawi.Mizo hmeichhia Dubai lama housemaid tura kalten buaina an tawh chungchanga thu kal zelah sawrkar anga hmalak ngai tamtak a awm nia hria in Congress Thalai chuan, dan felfai tak a awm theihnana hmalakna tura an ngaipawimawh chu Thawhtanni khan chief minister hnenah thlen an tum a, security lamin kaltlang an lo phal loh avangin reilote an innawr buai a, a hnu ah an inkawm thei a ni.
Chief minister chuan kum 2015-a Mizoram sawrkarin hnathawka inthawnchhuah theihna tura dan a siam, ‘The Mizoram Private Placement Agencies Regulation Act 2015’ chu a tobulah a felhlel a, he Regulation section 2 leh 8 ah, mi an thawnchhuah theihna hmun tarlan hi ‘Mizoram pawn’ tih a ni a, hei hian khawvel a huap thei tlat tih a sawi.
He dan hnuaiah Aizawl DC-in private placement agency 27 hnenah license a pe a. Sawrkarin Mizoram pawnah an thawn thei lo, tiin a dang si loa, a dan tlawhchhan chuan Mizoram pawn khawi hmunah pawh an thawn thei si a. Hei vang tak hian Assembly House-ah amah pawhin agency-te hi zaah za in an thiam lo bik lo e, a tih chhan pawh a ni tih Lalduhoma hian a sawi. “He dan hi India ram chhung atan chauha siam nise a fel mai tur a ni a; a dan hi a felhlel a ni,” a ti.
Dan dik taka India ram pawna hna thawka inthawnchhuak tur chuan Immigration Act 1993 hnuaiah Ministry of Overseas India Affairs-a Protector of Immigrants kaltlangin license dil tur a ni a. Hetiang hian state dang pawhin ram pawna hnathawk tur an thawnchhuak thin tih a sawi.
Mizorama placement agency-te chu Immigration Act hnuaia an inziahluh loh avangin dan anga thawn chhuah theihna an nei lo tih hriatchhuah a ni a, 2023 September 14 khan Mizoram State Commission for Women chuan FIR a thehlut a, an vaiin agency mi leh sa mi 30 man an ni a, MP inthlan a lo ni nen, agency 27 lai enzui chhung a rei deuh hlek tih a sawi. An case awrh hi bailable a ni a, bail-in an chhuak rih tih chief minister hian a sawi a ni.
He case-a prosecution ti turin Protector General of Immigration atangin prosecution sanction lak a ngai a, kumin January 25 khan dilna thehluh a ni a, March 18-ah ‘reminder’ thawn niin, April 11 khan an remind leh a, chhanna a la awm lo tih a sawi. Hemite hian prosecution sanction an rawn pek chuan court thu thu a ni tawh dawn tih a sawi a ni.
“Agency ho dan bawhchhiat hi Immigration Act hnuaia license an neih loh te, passport dik lo hmantir leh thil dang dang a ni a. Heng zawng zawng hi investigation-ah hian a tel vek. Nikum October 4 khan placement agency-te license hi temporary-in DC-in a suspend sak a, tunah permanent-a cancel a ni dawn,” a ti.
“Tuna kan dan neih hi a rang a ranga siamthat a ngai. Zofate Zoram pawna chhuak ho hi a enkawltu bik neih a ngaiin kan hria a, sawrkarin a buaipuitu tur bik ‘Cell’ kan din dawn. Notification hi chhuah mai theih a ni tawh a, model code of conduct vangin kan la tichhuak ngam lo a ni,” Lalduhoma hian a ti.
Hetihrual hian agency lam pawhin amah an hmu a, Immigration Act hnuaia license neih tum tura a chah angin nei pawh an awm tawh tih a sawi bawk.
Harsatna tawk chhanchhuah kawngah mimal tlawmngaite an fakawm hle tih chief minister hian a sawi a. India Embassy-in an rawn thlawh hawna tur a tumsak vek tih an finfiah tawh a, a then Aizawl thleng ticket laksak an nih laiin a then Guwahati, a then Delhi a ni a, hemi chinah hian mimal leh Mizo Welfare-ten a tul angin an lo pui a, a tirchhuaktu agency lam pawhin engemawzat an tumsak a. Chuti chungin, heng mite hi an haklai nen chauh an lo haw a, anmahni tanpuina tur bank account siam a la nih cheu chhan, sum tlingkhawm leh sum hmanna pawh tuna he case chhuinaah hian chhui tel a ni dawn tih a sawi a ni.