Play-off khel tur Warriors

Play-off khel tur Warriors
Thawhtan zing khan NBA regular season 2022-23 khelh zawh a ni a, regualr season khar niah champion lai Golden State Warriors chuan hnehna pawimawh tak an chang a,m play-off khel turin an tling. Inkhel dangah LA Lakers chuan Utah Jazz hneh mah se play-in an khelh a ngai dawn tho thung.
Play-off khel phak tura chak ngei ngei mamawh Warriors hian Portland Trail Blazers lakah ropui chungchuang takin bul an tan a. Quarter hmasa berah point 55 zet thawkchhuakin, an khingpuite hian point 27 chauh an thawkchhuak a, point 28 zetin hma an hruai nghal der. Warriors hian NBA-ah quarter khatnaa point thawkchhuak hnem ber record an siam nghal
|ha chungchuang taka bul an tan hnuin quarter dangah pawh chungnung zawkah an tang vek a. Quarter li an khelh zawh meuh chuan point 157-101 zetin hnehna an chang a, an khingpuite an sawp hle. Hnehna pawimawh an chan vangin champion lai Warriors hian Western Conference-ah parukna ni chungin regular season an khar a, play-off khel turin an tling.
Blazers an sawp tum hian MVP vawi hnih ni tawh Stephen Curry chuan minute 22 khelin point 26 a thawkchhuak hman. Warriors hian play-off ah Sacramento Kings an hmachhawn zui leh ang.
Season tira bul tan tha lo, an player pawimawh LeBron James a inhliam ngun vanga chak harsat thin Los Angeles Lakers chuan thawhtan zing vek khan Utah Jazz an hmachhawn a, point 128-117 in hnehna an chang. Jazz lakah chak bawk mahse Lakers hian hi play-off khel turin an tling nghal lova, play-in an khelh leh phawt a ngai dawn a. Play-in ah hian Minnesota Timberwolves an hmachhawn dawn.