Liverpool in Arsenal an chelh

April 9, Pathianni zan khan English Premier League-ah inkhel ngaihven hlawh tak a awm a; Anfield ah Liverpool leh Arsenal an inkhel. Inkhel hmuhnawm tak si hnih an phurh hmasak zet hnuin Liverool in Arsenal an inhnehtawkpui a, Gunners kal fal tur an chelh. Anfield ah Arsenal an chak zawh loh vangin champion tuma inumna boruak a nung thar a, Arsenal leh Manchester City te inkarah point ruk chiah a tla zep tawh.
Anfield ah Laipui a puak hma
Khelmuala ropui, mikhualte talbuaina thin Anfield a lenglut Arsenal hian an hmahruaina sawh nghet a, point riata hmahruai chhunzawm turin Liverpool hneh an mamawh a. Darkar chanve hmaa goal hnih an thun hman vangin kum 2012 hnu lama a vawikhat nan Anfield-ah an chak teuh hle nghe nghe. Anfield-ah Laipui puak hma mah se an hmahruaina an humhim zo lova, uiawm takin point hnih an hloh.
Arsenal hian an tan inkhel hautak leh fiahna pawimawh tak ni tura ngaihah bul an tan tha a, goal pawh an thun thuai. Liverpool tlarhnung inthlahdah hremin Gabriel Martinelli chuan minute riatna lekah a pet goal a, hmahruaina goal a thun nghal. Hma takah goal an thun vangin Gunners an phur leh zual a, an chetla pawh a hmuhnawm zui viau.
Goal thun tuma an innawr tawn fo hnuin Arsenal bawk che fuh zawkah an tang hmasa leh. Gunners hian tha zetin an nawr let thut a, Brazil player pahnih dang zo lo vin Reds in goal an chhuah belh. Minute 28-naah Gabriel Martinelli siamsak tha tak chu Gabriel Jesus chuan fuh zetin a tauh goal a, an goal hnihna a thun. Si hnih faia hma an hruai vangin Arsenal hi point thum hmu tura ngaih an ni hman.
Hmahruaitu Arsenal lakah bul tan tha lovin, goal hnih chhuah hmasa mah se Liverpool an hnual lova, an buai rei hek lo. Na zetin an khingpuite an nawr let a, si nghak Asron Ramsdale paltlang thei lo thin mah se chawlhlawk hmain goal an thun ta nge nge. Fuh taka ball an inpek kual hnuin captain Jordan Henderson ball pek rang tak chu Mo-hamed Salah chuan hnaite atangin a pet goal a, minute 42-naah an si phurh a sut then.
Salah goal thun hnuin game a inthlak thleng hlawk; Liverpool an khel tha a, Arsenal an buai ve thung. Reds hian na takin an mikhualte nawr thin mah se chawlhlawk hmain goal dang an thun belh thei lova, hnufual zawk ni chungin chawlhlawk an hmang phawt.
Chawlhlawk hnu lamah Reds in an si phurh sut tumin tan an khawh zui nghal chat a, boruak sang tak hnuaiah goal thun theihna hun tha neiin penalty an hmu. Rob Holding-a’n Jota a tihtluk vanga penalty an hmuh hi Mohamed Salah chuan petin, goal pawnah a petchhuak teh tlat a, uiawm takin hun tha a hloh. Salah-a’n penalty a thelh hnu hian Liverpool hian Arsenal an nawr bet hmiah a, goal thun theihna hun tha nei mawlh mawlh mahse Ramsdale an paltlang thei lova, Gunners an him hram hram zel.
Si nghak Aaron Rams-dale a chet ropui em vangin Arsenal him hram hram thin mah se an him tluan tling thei lo ta nge nge. Hun pangngai tawp dawn tep minute 87-naah defender Alexander Arnold chuan fuh zeta a khal tlang hnuin tha zetin a siam lut a. Arnold siam tha tak hi bench atanga lut Roberton Firmino chuan fuh zetin a tauh goal a, an si phurh a sut. Firmino goal thun hnu hian goal dang a luh belh thei tawh lova, inkhel hmuhnawm tak chu 2-2 a inhnehtawkin a tawp. Anfield-ah chak zo lo mahse lawm zawk tur chu Arsenal an ni.