PM Ekta Mall leh a behbawm….

Mizoram Tourism Department chuan PM Ekta Mall chungchangah ‘thuthang dik lo’ tam tak a awm tiin Mizorama PM Ekta Mall din tum mek chungchang sawifiahna thuchhuah nimin khan a tichhuak a. Thuchhuahah hian, ‘thuthang dik lo’ a tih hi political party atanga chhuak nge, pawl atanga chhuak nge, mimal atanga chhuak tih tarlan tel a ni lo va, PM Ekta Mall buaipui a nih dan tluangtlam takin tarlan a ni.
PM Ekta Mall hi State leh UT 36-ah dah vek tur a ni a, Mall tinah hian state leh UT 36 te stall a awm kim vek tur a ni a, Mall neitu state erawhin an state chhunga district awm zat stall an dah belh thei ang. Mizoramah chuan State/UT Mall 36 a awm bakah district 11 tan stall a awm ang a: Mizorama PM Ekta Mall (Unity Mall) chuan stall 47 a nei dawn tihna a ni. Assam chuan PM Ekta Mall hi an sa zo tawh a, kumin March thla khan PM-in a hawng tawh; a project cost hi cheng Vbch 278 niin, stall 71 a awm a; chumi awmzia chu, Assam hian district 35 a nei tihna a ni. PM Ekta Mall tinah hian stall bakah thildang tam tak a awm bawk dawn, sawi vek sen a ni lo.
Mizoramah chuan sawrkar hmasa (MNF) hun laia hmalakna a ni a, 24.08.2023-ah DPR submit a ni a, project cost cheng Vbch 127 a ni. Sawrkar thar (ZPM) a lo pian hnuah sawrkar laipuiin ni 12.03.2024 khan a rawn sanction a; hemi rual hian cheng Vbch 63.5 (50% of project cost) dawn nghal a ni.
Sanction hmuh hnu hian Mall sakna tura ruahman FCI godown, Zuangtui chu a remchang leh lo tih hriat chhuah a ni a, DPR siam thar a ngai. Tourist Home, Zonuam chu DPR pahnihna atan hman a ni. Mahse, outsource lai a lo ni si a, court-ah thubuai a lut a, sawrkarin a hneh lo.
A tawp a tawpah, DPR pathumna Printing & Stationery Department ram, Chawnpui chu a remchang ta hram.
Mall sak hna thawk tur thlan chungchang hi Tourism Department thuchhuah chuan chipchiar takin a tarlang. A tawi zawngin, ni 18.07.2025 khan contractor atan SPG Infra Projects Pvt Ltd. thlan a ni a, ni 23.08.2025-ah chief minister-in hna tanna turin lungphum a phum.
Heta lo lang ta chu, central lamin project cost 50% an rawn release tawh hnuah, DPR dik lo avangin hna thawk thei lovin, cheng Vbch 63.5 chu kum khat leh thla 4 zet kan dah tawl tihna a ni ber awm e!
Tunah hian physical progress 18% vel nia sawi a ni a. Harsatna dang a awm tawh lo a nih chuan, kum 2027 chawhma lamah PM Ekta Mall hi zawh theih beisei a ni, tiin thuchhuahah tarlan a ni a; full speed-a thawh a ngai dawn a nih hmel!