PM kalna tur kawngpui ho pumpelh dan dap turin chah

September 13 hian Prime minister Narendra Modi chu Aizawlah a lokal dawn a, a chetvelna tur Fakland leh Sikulpuikawn inkarah lirthei leh kea kalte tan tul loa hun kan sen thlawn lohnan a pumpelh dan lo dap lawk a fuh dawn tih sawi a ni.
Senior SP Traffic Aizawl chuan mipui hnenah ngenna siamin, September 13-a Prime minister-in Mizoram a rawn tlawh hunah VVIP chetvelnaah harsatna a thlen lohnan VVIP route – Falkland peng atanga Bawngkawn – Chanmari – Treasury Square – Sikulpuikawn chu darkar hnih-thum chhung vel khar a ngai maithei a, mipui kea kal leh lirtheia veivakten hun kan sen thlawn lohnan lo inhmakhua a, pumpelh dan kawng zawng turin an inhriattir tih a sawi.
VVIP programme neih chhung hi chuan mipui lam pawh lirtheia veivak tam lo turin an inngen tih a sawi a. Thuampui leh Sikulpuikawn inkar kawngpui dungah lirthei, bungrua leh thildang engmah dah phal a ni lo tih a sawi a ni.
Aizawla Prime minister a cham chhung hian a rawn kal chhan programme tluang taka hman a nih theihnan leh venhimna tha taka kalpui a nih theihnan Aizawl district magistrate chuan danin tlawhchhan hmangin thupek a chhuah a. Aizawl district huamchhungah remote control hmang drone/ aerial camera emaw hetiang lam chi reng reng, September 4-a thupek chhuah a nih atanga September 15 thlengin mi tumahin an hmang/ thlawh tir tur a ni lo, a ti.
Thupek bawhchhia chu an drone/ aerial camera man emaw kahthlak sak an ni anga, dan hmangin hrem an ni ang tih a sawi.