PM Modi an AIIMS Guwahati hawng

Prime Minister Narendra Modi chuan Northeast-a AIIMS hmasa ber Rs 1,123 crore a sak chu April 14 khan a hawng.
AIIMS Guwahati leh medical college-te chuan Assam leh northeastern State-ah healthcare infrastructure a tiphuisui dawn a ni tiin a sawi a.
Khum 500 awm theihna tertiary care teaching hospital-ah hian undergraduate department 24 a awm dawn a, hei bakah hian medical college dang pathum lungphum phum bawkin kum khatah MBBS zirlai 100 lak belh thei dawnin tihian kum khatah Assam state chhungah MBBS zirlai 1500 an awm thei dawn a ni.
PM Modi chuan a sorkar chuan tun hnai kum kua chhungin Northeast ah social infrastructure nasa taka hmasawnna a awm theih nana a thawhrim thu a sawi bawk a.
“Sorkar hmasaah te chuan Northeast chu hmun hla a ni a. Keini chuan a hnai thei ang bera siam turin theihtawp kan chhuah a ni” tiin prime minister chuan a sawi.
“Tun hnai kum kua chhungin Northeast-ah social infrastructure lamin nasa takin hmasa a sawn a ni” tiin AIIMS Guwahati campus a function neihnaah a sawi bawk a.
Opposition te beizuiin Modi chuan, “Keini chuan kan ram mipuite ngaih pawimawh hmasain policy kan siam a. Opposition te erawh chuan fak hlawh chauh duhin chung mite chuan ram an tichhe thin,” tiin a sawi a, “Mipuite tana thawh duhna rilru nen hna kan thawk a ni,” tiin a sawi bawk.
PM Modi hian Rs 546 crore senna tur Assam Advanced Healthcare Innovation Institute (AAHII) State sorkar leh IIT Guwahati tangkawp tena an din tur lungphum a phum bawk a.
AAHII chu medicine leh healthcare, multidisciplinary research lamah leh engineering leh healthcare te kalkawp tira invention leh innovation awm theih nana hmalak chu a tum ber a ni a.
Prime Minister chuan beneficiary 1.1 crore te hnena pek tur Ayushman card hawnna a nei bawk a, heng mite hian heng card hmang hian Rs 5 lakh thlengin cashless healthcare medical treatment benefits an la thei dawn a ni.
AIIMS, Guwahati lungphum hi May 2017 khan Modi-an a phum niin Rs 1,20 crore chuang sengin sak a ni a, he damdawi Inah hian khum 750 a awm thei dawn a, chung zinga 30 chu AYUSH khum a ni ang.