PM Modi an ‘dynastic’ party tiin khak

Prime Minister Narendra Modi chuan June 13 khan ‘dynastic’ political parties te chu sorkar hnalakah te ‘nepotism leh eirukna’ kalpuiah puhin heng party te hian thalaite ‘an ruksak’ tia sawiin heng thalaite hma lam hun hi a sorkar chuan humhim tumin hma a la tiin a sawi.
Sorkar hnathawk thar 70,000 te tana appointment letter a sem chhuahnaah dynastic party te chuan thalaite chu phatsanin eirukna leh duhsakna uchuak hna an laknaah an kalpui tiin a sawi.
Tun hma chuan hnalak nan chuan kum khat leh a chanve lawih te a awh thin tia sawiin tunah chuan langtlang takin thla rei lo te chhungin chinfel a ni thin, a ti bawk a.
“System tinah dynastic political party tena duksak uchuakna leh eirukna an kalpui dan kan hmu vek a. Heng dynatic party te hian thalai vaibelchhe tel an phatsan a ni,” tiin party hming hmerha lam si lovin a sawi a.
Kum 2014-a kan sorkar a pian khan langtlang a awm nghal a, sorkar hnalaknaah induhsakna uchuak a tawp nghal bawk, tiin a sawi bawk.
Kum sawm kalta ai khan India chu ngelnghet, him leh chak zawk a ni tawh tia sawiin tlang hraka thil a kalpuina chu Indian sorkar identity a ni ta a ti bawk a.
Tunah chuan private leh public sector lamah hna a tam tawh ti bawkin Mudra Yojabna, Start Up India leh Stand Up India te hmangin self-employment opportunity a tam tawh a ti bawk a.
“Tun hmain tun ang hun aia economy lama kan inrintawkna a awm ngai lo. Kawng lehlamah chuan pandemic avangin economy than a muang a, a lehlamah Ukraine indona avangin supply chain a buai bawk a. Tichung chuan India chuan a economy chu sang takah a vawrh tho a ni,” a ti bawk a.
Kan sorkarin thutlukna a siam te hmangin private sector-ah pawh opportunity nuai tel tehmeuh siamin a awm a ti bawk a. PM Modi chuan ‘Rozgar Mela’ chu BJP leh NDA sorkar identity thar a ni tawh a ti bawk a.
“Tun hi ‘Azad Ka Amrit Kaal’ a intan tawh avangin sorkar tana hun remchang a ni a, hnathawk tura lak thar te chuan India chu tun atanga kum 25 chhunga developed ram ni turin theih tawpin an bei dawn,” tiin Mopdi chuan a sawi bawk.
Political corruption, scheme a malpractice, public fund hmansual te kha sorkar hmasa te identity a thin tiin a sawi bawk a. “Tunah chuan India chu politics lama a ngelnghehna avanga hriat hlawh a ni tawh a. Khawvel huapin India sorkar chu thutlukna siam ngamah ngaih a ni tawh a. India sorkar chu economic leh progressive social reforms nena hmehbel a ni ta,” tiin a sawi bawk.