February 1, Inrinni zan khan English Premier League khelh chhunzawm a ni a. Si hnih faia AFC Bournemouth hnehtu Liverpool chuan point 11 zetin hma an hruai fal tawh a, champion an hnaih deuh deuh zel. Inkhelh dangah Bournemouth laka mualpho Nottingham Forrest chu Brighton & Hove Albion lakah an inhrithla a, 7-0 ngawta hnehna changin, pathumnaah an insawhnghet ve bawk.
Dan theih loh Salah
Season kal meka chetha tluang tak Liverpool hi AFC Bournemouth hmachhawn turin Vitality Stadium-ah an lenglut. An len luhna mualah dan theih loh Mohamed Salah goal hnih thun hmanga hnehna changin champion an hnaih deuh deuh zel.
Pasarihnaa awm mek Bournemouth hi an mikhual Liverool lakah an khel tha viau a, season kal mekah a khelh that thin em vanga ngaihven hlawh hat Antoine Samenyo a hmuhnawm thei hle. An mikhualte hi tihthat fo thin mah se chesual hmasa zawkah an tang tlat thung. Darkar chanve an khel tling chiah tihin Bournemouth hian inhnial theih takin penalty an chawi. He penalty hi season kal meka goal thun tluang tak Mohamed Salah chuan singhak chetha Kepa venah ngei awlsam takin a pet goal a, hmahruaina goal a thun. Salah goal thun hmang hian Reds in si khat faia hmahruai chungin chawlhlawk an hmang.
Chawlhlawk hnu lamah mulneitu AFC Bournmouth an khel tha a, an si phurh an sut teuh hle. Mualneitu lam hian an si phurh sut bawk mah se VAR rawn a nih hnuin an goal hi hnawl a ni thung. An goal hnawl a nih hnuin Samenyo chuan goal thun theihna hun tha zet mai a nei a, si nghak chetha tak Alisson Becker chuan a lo dansak tlat thung. Bournemouth tan hian Marcus Tavernier chuan a pet goal teuh viau a, goal post in Reds a chhan leh tlat thung. He ball per let leh hi Justin Kluivert chuan awihawm loh khawpa hoin a thelh zui leh zat a, Liverpool an him nwan leh tlat. Dinmun derthawng taka an awm hnuin Liverpool hian Kluivert chetsual an hrem a, fuh takin mualneitu an nawr let. Liverpool hian an hun tha neih an hlah ve duh lova, goal hmahruai thuntu Mohamed Salah chuan minute 75-naah mawi zetin a pet goal a, an chakna a nem nghet ta a ni. Salah goal thun pahnihte hi hun tawp thlengin AFC Bournemouth in an sut thei lova, team lian Arsenal leh Manchester City bakah season kal meka chetha Nottingham Forrest hneh thei ni bawk mah se Liverpool lakah erawh an tlawm ta a ni.
AFC Bournemouth laka goal hnih thun Mohamed Salah khan EPL-ah goal 178 a thun tling ta chiah a. EPL-a Frank Lampard goal thun zat goal 177 chu goal khatin a khum a, EPL-a goal thuntu ropui zinga a hming a langsar zual deuh deuh zel. Bournemouth lakah an chak leh tak vangin Liverpool hian point 11 zetin hma an hruai fal ta a, champion an hnaih deuh deuh zel. Pathianni zana Arsenal result a zirin Reds hmahruaina hi a tlem leh hret thei bawk.
Nottingham Forrest an inhrithla
Kar liam ta maiah AFC Bournemouth lakah 5-0 ngawta tlawm a, an mualpho hnuin Inrinni zana an mikhual Brighton lakah an inhrithla a, 7-0 ngawtin hnehna an chang. Brighton sawptu Nottingham Forrest hi pahnihnaah an insawh nghet.
Nottingham Forrest tan hian Chris Wood chuan minute 32, 64 leh 69-ahte goal thuninhattrick a siam a. Brighton player Lewis Dunk-a’n an lama a tih-goal bakah Morgan Gibbs-White, Neco Williams leh Jota Silva ten goal khat theuh an thun bawk. An mualah 7-0 ngawta an chak hian inrintawkna sang zawk a pe ngei dawn a. Campions league khelh phak ngei tumin tan an khawh zui ang.
Inrinni zana inkhel dangah Everton chuan an mikhual Leicester City chu 4-0 ngawtin an lo sawp a. Hetihlai hian table mawngphaha awm Southampton chuan Ipswich Town an hneh ve nawlh bawk.
Point 11 in Liverpool an sang fal
Get real time updates directly on you device, subscribe now.
Prev Post
Next Post