Poland-in Ukraine pui tawh dawn lo ti

Ukraine thlawptu langsar ber pakhat Poland chuan ram pahnih diplomatic lama inlaichinna in chhiat lam a pan mek karah Ukraine hnenah ralthuam a pek zui tawh loh tur thu a puang.
Poland prime minister chuan tunah chuan modern weapon tha zawk hmanga mahni invenna lama inthuam that an buaipui tawh zawk dawn tiin a sawi.
Thawhlehni khan Poland chuan Ukraine ambassador chu UN-a Ukraine President Volodymyr Zelesnky-a thusawi chungchangah insawifiahna nei turin an ko hial a ni.
Ram thenkhatte chuan Ukraine an thlawp der tia sawiin, Warsaw chuan chu chu Poland, Ukraine indona ni khatna atanga pui rengtu tan chuan a ngaihmawhawm a ti bawk.
Poland Prime Minister Mateusz Morawiecki chuan television kaltlanga thusawina a neihah Ukraine hnenah tun hnaia ‘grain import’ chungchanga inbakkaihna an neih hnuah ralthuam thawnluh a tum tawh loh thu a sawi zui bawk.
“Ukraine hnenah ralthuam kan pe tawh dawn lo, a chhan chu modern weapon tha zawk nen Poland kan thuam tawh dawn a ni” tiin Morawiecki chuan a sawi.
Russia in Ukraine a run hnuah ei leh bar thawnchhuah lamah harsatna a awm zui a, Black Sea shipping lane thawnchhuah leh lakluh nan bera hman chu khar niin Ukraine chuan hmun dang leh kawng dang a zawng reng a ni. Chuvang chuan central Europe-ah grain thahnem tak chhawpchhuah loh theih lohin a awm a ni.
Chutihlaiin European Union chuan Ukraine grain tam lutuk in local price a tihhniam nasat laka ven nan ram panga Bulgaria, Hungary, Poland, Romania leh Slovakia bikah te phei chuan thawnluh a khap a ni.
He khapna hi 15 September-a tawp tawh kha a ni a, EU chuan tharthawh nawn a tum lo va. Mahse, Hungary, Slovakia leh Poland-te chuan kalpui zui zel an ti thung.
European Commission chuan bloc trade policy kalhin EU member ten chet an la tur a ni lo a ti.
Tunkar tirlam khan Ukraine chuan World Trade Organisation (WTO) hnenah grain thawnluh khap avang hian a zualko zui a, international obligation an bawhchhia a ti a ni.
Ukraine Economy Minister Yulia Svyrydenko chuan ‘Ukrainian bungruate member state mal ten an duha an dan theih ngawt a ni lo’ tiin a sawi a. Mahse, Poland chuan Ukraine grain chawkluh khapna chuan an kenkawh tur thu sawiin ‘WTO hnena zualko hian min hneh lo hle’ tiin an sawi zui nghal thung.
Morawiecki chuan Kyiv in grain chungthua buaina chu a kalpui nasat chuan Ukraine atanga chawkluh tam zawk an khap zui ang a ti zui bawk a. Poland foreign ministry chuan ‘multilateral forum-a Poland nawra international court-a zualko hi ram pahnih inlaichin nan a tha lo’ tiin a sawi bawk.
Khap a ni chungin ram pathumte chuan Ukraine grain tena market dang an pawh theih nana an ram an paltlang erawh an la phalsak zel tur thu an sawi zui thung.
Kyiv chuan Poland chu insum tura ngenin an ambassador a kohah harsatna an neihte chu inbiakna dawhkan kila chinfel dan zawn ni se an ti bawk.
Hetihlai hian French Foreign Minister Catherina Colonna chuan EU tena zirchianna an neihah Ukrainian grain import chuan European farmer-te a tichhe dawn lo tiin a sawi bawk.
Poland hian Ukraine indonaah nasa taka puiin Germany siam Leopard 2 battle tank bakah jet fighter te hial pe-in Ukrainian refugee 1.5 million an ramah a awm tir bawk a ni.