Police 300 vel lak kan tum – Home minister

Sawrkarin constable 300 vel la turin hma a la mek a, a hlawhtlin ngei a beisei tih Home minister K Sapdanga chuan a sawi.
Zirtawpni khan Home minister hian 3rd IR Battalion Hqrs. Thingkah leh Lawngtlai district SP office a tlawh a. Heng hmuna thu a sawinaah sawrkarin police indaihlohna hria in, constable 300 vel lak tumin hma a la tih a sawi a. Khawtlang mipui innghah ngamna ni turin police hrisel tak an nih a tul hle tih sawiin, theihtawpa mahni taksa hriselna ngaipawimawh thar turin a chah.
Mizoram chu India rama state ralmuang ber a nih rualin, ralmuanna hian inthlahdahna a keng tel fo tih a sawi a. Inthlahdah lo leh inring renga awm chu police nuna bet tlat tur a ni, tiin, chutiang rilru pu tur chuan police zawng zawngte a chah tih a sawi. Battalion-te dinhmun bakah mahni hna thawk tha duh lo leh thawk thei lote zirchian mek a ni tih a sawi a. “Battalion pakhata awm reng theih a ni lo a, a tul dan anga insawn a ngaih chang a awm a ni,” K Sapdanga hian a ti.
India ramah Mizoram Police an tha ber, tih theihna turin puanven sawichhinga tan la thar turin a beisei tih a sawi bawk.
3rd IR Bn hi kum 2007-a din a ni a, 2023 April 12 khan tuna an awmna Thingkah hi luah tanin, tunah mi 304 an awm mek.
Lawngtlai district-ah sub division pahnih – Lawngtlai leh Chawngte awmin, police station 5 a awm a; police 131 an awm mek. Lawngtlai district hian international border pahnih – Myanmar leh Bangladesh a nei a ni.