Police-in an hnathawh thlirletCase 818-ah 107 chingfel tawh

Police-in an hnathawh thlirlet
Case 818-ah 107 chingfel tawh
Ni hnih awh tur Aizawl District Crime Review Meeting 2025 chu Ningani khan tan a ni a. DIG (Northern Range) Ashok Malik chuan a hawng.
Hnathawh thlirletnaah hian Aizawl SP bakah Aizawl district-a sub divisional police officer (SDPO) ho, police station-a officer -in- charge (OC) ho leh investigating officer (IO) chin an tel a ni.
Aizawl district-a police station hrang hrangah kumin January atanga June chhung khan thubuai 818 ziahluh a ni a. Thubuai ziahluh atangin in rawk leh rukruk tam berin, zaa 65 a tling. Rukruk thubuai zaa 14 chu lirthei ruk thubuai a ni a. Thubuai ziahluh zinga 107 chu court-in chingfel tawhin, heng zinga zaa 89-ah thil tisualtute thiam loh chantir an ni
Dan bawhchhiatna leh suahsualna hrang hrang laka mipui kan invena kan him theihnan Aizawl District Police chuan theihtawp chhuahin hma a la tih sawi a ni a. Hmun hrang hrangah dan leh hrai inzirtirna a buatsaih thin. School leh college bakah Naupang Sunday School chawhnu inkhawmah awareness programme buatsaih thin a ni bawk.
India ramah dan thar (New Criminal Law) 2024 July 1 atanga hman tan a ni a, mipui hnena hrilhhriat leh zirtir hna nasa takin an kalpui tih an sawi a. Ruihhlo laka mipui, a bikin thalaite an him theihnan ruihhlo that loh zia inhrilhhriat thin a ni. Hursualna leh hleilenna laka hmeichhia leh naupang an him theihnan hmun tam takah inzirtir buatsaih a ni a. Kumin chhungin dan leh hrai chungchang inzirtirna vawi 24 buatsaih tawhin, mi 4895 zirtirna pek an ni.

Aizawl District Police hmalakna:

8 Dan loa Mizorama lutte endik hna police station hrang hrangin an thawk a. Inner line permit nei lo emaw ILP dik loa lo lut leh awm mekte dao thin a ni. Kumin chhungin ILP checking vawi 41 neih tawhin dan bawhchhia 195 man an ni tawh.
8 Lirthei ruk Mizoram pawna kalpui leh hralh a nih lohnan police station hrang hrangin zan lamah lirthei veivak an endik thin.
8 Aizawl khawpuiah in rawk leh rukruk laka mipui himna atan leh suahsualna hrang hrang laka mipui venhimna atan police station pali chuan an huamchin theuhah zantin police patrolling an nei thin a, tunlai hian police patrol hi team 10-ah inthenin Aizawl hmun hrang hrangah zantin tlaivarin an duty thin.
8 Aizawla police station-te chuan CEIR (Central Equipment Identity Register) portal chu mobile phone bo chhuichhuahna atan tangkai takin an hmang.
8 CEIR kaltlangin mobile phone bo 284 chhuichhuah niin, hengte hi mobile phone neitute hnenah hlan let an ni. A titha ber Bawngkawn P/S-in CEIR kaltlangin mobile phone bo 143 chhuichhuak tawhin, a dawttu Aizawl P/S-in 104 an chhuichhuak tawh.
8 Mobile phone bo chhuichhuah kawngah hian constable Ramengmawii, Bawngkawn PS chuan a mimalin a thawhhlawk em em a, a taimak leh thawhrim avangin thla li chhungin mobile phone bo 120 a chhuichhuak a ni. A hnathawh that vangin July 9 khan reward hlan a ni bawk.