Police vote thlak ve lote tan ruahmanna siam theitu ECI

IMP inthlana state danga duty Mizoram Police zinga vote thlak ve hman ta lo te chu state Election hotute chuan Election Commission hnenah vote an thlak theih nan a thlen sak tawh a, chhanna lawmawm dawn a la ni lo. The Aizawl Post-a tarlan tawh angin, Lok Sabha member inthlan thawh khatnaa vote thlak tur zingah Mizoram telin, April 19-ah vote thlak a ni a. tuna vote thlak ve ta lo te hi Mizoram pawna inthlan duty-a chhuak an ni a, state dang chuan duty tura chhuah hma in engkim tihfel ngai tia vote an thlak fel vek hnua an chhuahtir laiin, Mizoram Police bik hi vote an thlak ve theih dan tur ruahman fel a nih hmaa tirhchhuah an ni.
Election Commission of India-in dan thar a duang a, tunhmaa police leh midang, vote an neihna hmun ni loa inthlan duty-a chhuah ngaite tana postal ballot hmanga vote thlak theih mai thin chu titawpin, duty-a chhuak turten an chhuah hmaa vote an thlak theihna tur Falicitation Centre ruahman a ni a. Tun tum Lok Sabha inthlanah khan Falicitation Centre ruahman fel chu sawi loh, candidate la hriat kim hma, ballot paper siam theih hma in Mizoram Police zinga state pawna duty turte hi chhuah tir an ni.
Inthlan duty tura thu petu ber hi sawrkar laipui Home ministry a ni a, Mizoramah chuan chief electoral officer office kaltlang loin Home/ Police department-in a lo dawng a, hetiang hian ruahmanna siam a ni ta nia hriat a ni
State Election department hotute chuan, police lamin vote an thlak hma chuan an kal theih loh tur thu sawi nachang lo hria se chuan, hei hi pumpelh theih a nih a rinawm laiin, a nachang an lo hre bik si loa, an ni kaltlangin thil tih a ni chiah lo bawk nen, hetiang hian a buai zo ta ni bera a lan thu an sawi a. Vote thlak tura ruahmanna siamsak leh theitu chu ECI a ni tih an sawi.
PC Party chuan May 18 khan Election Commission of India hnenah Mizoram Police mi 1047 ten vote an thlak theih nan hma la tura ngenna an thlen tih sawiin, ‘Heng miten vote an thlak theih nan hian Election department lam pawhin hma an la a, mah se, tun thlengin vote an thlakna tur ruahmanna a la awm lo. Tun inthlanah Electronically Transmitted Postal Ballot System (ETPS) hman a nih reng lai a, mi 1047-in vote an thlak leh thlak loh chu result tidanglam thei khawp niin kan hria a, kan ngaimawhin kan ngaipawimawh hle a ni,’ a ti.